Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 143 Hüküm no: 164 Orijinal metin no: [31b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Osman ile Ali b. Osman’ın muhâlaa yoluyla boşanma davası Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Evlice Baba mahallesi sâkinelerinden Fâtıma bt. Osman nâm hâtun meclis-i şer‘-i hatîr-i lâzımü’t-tevkīrde zevc-i sâbıkı işbu bâ‘isü’l-kitâb Ali b. Osman nâm hallâk mahzarında ikrâr ve takrîr-i kelâm edip zevcem merkūm Ali ile beynimizde şikāk ve adem-i vifâk olup bir hâl ile hüsn-i zindegânîmiz olma[ma]ğla zimmetinde mütekarrir ve ma‘kūdun-aleyh altı bin akçe mehr-i müeccelden ve nafaka-i iddet-i mu‘ayyene ve me’ûnet-i süknâmdan fâriğa olduğumdan mâ‘adâ mezbûrun firâşından hâsıl eylediğim sadriye sagīre kızım Ayşe’yi yedi yaşına değin malım ile infâk ve iksâ etmek üzre zevcim mezbûr Ali ile muhâla‘a-i sahîha-i şer‘iyye ile muhâla‘a eyleyip zimmetini, zevciyyete müte‘allik âmme-i de‘âvî ve mütâlebâtdan zimmetini ibrâ ve iskāt eyledim deyicek mezbûr Ali meclis-i mezbûrda ben dahi zevcem mezbûre Fâtıma ile ber minvâl-i muharrer hul‘-ı mezbûru kabûl ve zevciyyete müte‘allik âmme-i de‘âvî ve mütâlebâtdan mezbûrenin zimmetini ibrâ eyledim deyicek mezbûreyi kelimât-ı muharreresinde vicâhen tasdîk ve şifâhen tahkīk etmeğin kayd şud. Fî 15 min Zilka‘de sene [10]81. Şuhûdü’l-hâl: Abdullah b. Abdullah, Mehmed [b.] Ahmed, İbrahim [b.] Ahmed, Kara Cafer, Hasan b. Hızır, Ahmed b. Hızır, Hasan b. Abdullah.