Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 144 Hüküm no: 165 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı olup vaktiyle mükâtebeye bağlanmış Timurhan isimli câriyenin âzat olması gerektiği Uzun boylu, açık kaşlı, elâ gözlü, sivri burunlu, Rûsiyyetü’l-asl sâhibetü’l-kitâb Timurhan bt. Abdullah mahfil-i kazâda seyyidesi olup medîne-i Hazret-i Ebâ Eyyûb el-Ensârî mahallâtından Kiremitçi Süleyman mahallesi sâkinlerinden iken bundan akdem vefât eden Zamâne bt. Abdullah nâm hâtunun zevci Ahmed b. Abdullah ile mevlâ-yı itâkası Râbia bt. Hasan mahzarlarında üzerlerine takrîr-i da‘vâ edip seyyidem müteveffât-ı mezbûre hâl-i hayâtında beni mevlâsı mezbûre Râbia Hâtun vefâtı gününden beş sene tamâmına değin hizmet eylediğimden sonra âzâd olmak üzre kitâbete kat‘ edip ben dahi kabûl etmişken seyyidem mezbûre fevt olmağla bi’l-inhisâr vârisleri zevc-i mezbûr ile mevlâ-yı itâkası mezbûr Râbia, rık olmak üzre bana vaz‘-ı yed murâd ederler hâlâ suâl olunup kasr-ı yedlerine tenbîh olunmak matlûbumdur deyicek gıbbe’s-suâl ve akībe’l-inkâr mezbûre Timurhan müdde‘âsını mübeyyine beyyine taleb olundukda udûl-i ricâlden mahalle-i mezbûre müezzini Mehmed Efendi b. Yusuf ve oğlu Ahmed Çelebi li ecli’ş-şehâde makām-ı kazâya hâzırân olup istişhâd olunduklarında fi’l-vâki‘ müteveffât-ı mezkûre Zamâne hâl-i hayâtında bizim huzûrumuzda müdde‘iye-i mezbûre Timurhan mevlâ-yı itâkası mezbûre Râbia Hâtun yevm-i vefâtından beş sene tamâmına değin hizmet edip ba‘dehû âzâd olmak üzre kitâbete kat‘ edip ol dahi kabûl eyledi biz bu husûsa şâhidleriz şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyeti’l-kabûl şehâdetleri makbûle olmağın mûcebiyle ba‘de’l-hükm mâ cerâ kayd şud. Fî 15 min Zilka‘de sene [10]81. Şuhûdü’l-hâl: Mehmed Çelebi b. Veli, Ahmed Beşe Çukadâr, Mustafa Efendi b. İsmail, Eyüb Çelebi el-müsta‘id.