Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 144 Hüküm no: 166 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terkos’tan Ahmed b. Ahmed’in Ahmed Beşe b. Mehmed’e peşin para ile bağ ve ev satışı Havâss-ı aliyye kazâsı a‘mâlinden Terkos nâhiyesine tâbi‘ el-Hâc Mihaliç nâm karyede sâkin Ahmed b. Ahmed nâm kimesne meclis-i şer‘de râfi‘ü’l-vesîka Ahmed Beşe b. Mehmed mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ üç tarafı tarîk-i âm ve bir tarafı mer‘â ile mahdûd üç bâb tahtânî oda ve fırın ve tahmînen bir dönüm mülk bağımı, müşterî menzilimi cemî‘ tevâbi‘ ve levâhıkı ile mezbûre Ahmed Beşe’ye beş bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz eyledikden sonra merhûm ve mağfûrun leh es-Sultan Bayezid Hân-ı Velî evkāfı arâzisinden olup tefvîz-i âti’z-zikrin sudûruna değin karye-i mezbûrede vâki‘ her birinin hudûdu beynimizde ma‘lûm üç kıt‘a tarlalarımın dahi hakk-ı tasarruflarını bi izni’l-mütevellî mezbûr Ahmed Beşe’ye bin akçe bedel mukābelesinde tefvîz bi’l-ferâğ ile red etmeğin ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an altı bin akçeyi yedinden tamâmen ahz u kabz eyledim min ba‘d alâka ve medhalim yoktur deyû emlâk-i mezbûre mülk-i müşterâsı ve arâzi-i merkūme dâhil-i taht-ı tasarrufu olmuşdur, mutasarrıf olsun deyicek gıbbe’t-tasdîk kayd şud. Fî 16 [min Zilka‘de] sene [10]81. Şuhûdü’l-hâl: Ahmed Ağa b. İbrahim, Mehmed b. Nasuh, Durmuş b. İsmail, Hasan b. Hüseyin, Murtaza b. Abdullah, Handan b. Abdullah, Bayram b. Abdullah.