Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 145 Hüküm no: 167 Orijinal metin no: [32a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Hüseyin’in Mehmed b. Mehmed’deki ticarî alacağının tahsili talebi İşbu sâhibü’l-kitâb Hasan Beşe b. Hüseyin mahfil-i kazâda Mehmed b. Mehmed mahzarında üzerine takrîr-i da‘vâ edip bundan akdem kadri ve kıymeti ve cins ve vasfı beynimizde ilm-i şer‘î birle ma‘lûm yedimden müşterâ ve makbûz emtia‘-i mütenevvi‘a bahâsından mezbûr Mehmed zimmetinde iki bin yüz elli beş akçe hakkım olup meblağ-ı mezbûrun üç yüz akçesini bi’d-defâ‘at mezbûr Mehmed yedinden alıp kabz edip bâkī bin sekiz yüz elli beş akçemi dahi taleb eylediğimde mümâtale ile teslîmden imtinâ‘ eder, hâlâ suâl olunup alıverilmesi murâdımdır deyicek gıbbe’s-suâl mezbûr Mehmed cevâbında fi’l-hakīka müdde‘î-i mezbûr ber minvâl-i muharrer ba‘de küllî hesâb ile’l-ân zimmetimde bin sekiz yüz elli beş akçe lâzımü’l-edâ deynim bâkī kalmışdır deyû tav‘an ikrâr ve i‘tirâf etmeğin alâ mûcibi i‘tirâfihî mârrü’z-zikr bin sekiz yüz elli beş akçeyi edâ ve teslîm ile mezbûr Mehmed ilzâm olunup mâ cerâ kayd şud. Fî 18 min Zilka‘de sene [10]81. Şuhûdü’l-hâl: Mustafa Çelebi b. İsmail, Musa Çelebi b. Müdâm, Mehmed b. Mahmud, Hasan b. Abdullah ve gayruhüm.