Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 149 Hüküm no: 174 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Şalso’nun Yani v. Lerendo’da bulunan alacağını tahsil ettiği Vilâyet-i Rumeli’nde cezîre-i Mora aktâ‘ından Kalavrite kazâsına tâbi‘ Kertesi nâm karye sâkinlerinden Ali Çelebi b. Şalso nâm kimesne mahfil-i kazâda işbu hâmilü’r-rakīm Yani v. Lerendo nâm zimmî muvâcehesinde ikrâr ve takrîr-i kelâm edip yine karye-i mezbûre zimmîlerinden mersûm Yani’nin karındaşı alâ şer‘i’l-meclis Dimitri v. Lerendo nâm zimmî zimmetinde cihet-i karz-ı şer‘îden iki yüz yirmi kıt‘a esedî guruş hakkım olup karındaşı merkūm Yani edâ ve bana teslîm eylemek üzre yedime poliçe ta‘bîr olunur mu‘anven-i mersûm mektûb verip ben dahi zikr olunan mektûbu merkūm Yani’ye getirip mârrü’z-zikr iki yüz yirmi esedî guruşumu taleb eylediğimde merkūm Yani iki yüz yirmi esedî guruşumu bana def‘ ve teslîm ben dahi alıp kabz u tesellüm eyledim merkūm Yani’nin karındaşı merkūm Dimitri zimmetinde zikr-i sâbık iki yüz yirmi guruşdan bir akçe ve bir habbe hakkım bâkī kalmadı deyicek kayd şud. Fî 4 min Zilka‘de sene [10]81. Şuhûdü’l-hâl: Mustafa b. Şaban, Osman b. Abdullah, Mehmed b. Mahmud, Hasan b. Şaban, Mustafa Ağa b. Ali, Ahmed Efendi b. el-Kâtib