Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 153 Hüküm no: 180 Orijinal metin no: [34a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Mehmed’in küçük yaştaki kızını Ahmed b. Emrullah’a evlâtlık olarak verdiği Hazret-i Ebâ Eyyûb-i Ensârî mahallâtından İslâmbey mahallesinde sâkine olan Râbia bt. Mehmed nâm hâtun meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzıra olup Sultan bt. el-Hâc Osman nâm sagīre kızını, medîne-i mezbûre mahallâtından Ahmed Dede mahallesinde sâkin olan hâmil-i hâze’l-kitâb bevvâb-ı sultânî Ahmed b. Emrullah’a tebennî, terbiye ve iyâle maksadıyla teslîm etti. Mezbûr Ahmed de sagīre-i merkūmeyi tesellüm etti. Hâkim, sagīre-i mezkûrenin nafaka, kisve sâir havâic-i lâzimesi için, sagīrenin nafakası kime terettüb ediyorsa ve taleb hakkı kime âidse o kimesne üzerine olmak üzre zeyilde mezkûr târihden itibâren yevmî râyicü’l-vakt beş akçe farz ve takdîr etti. Hâkim meblağ-ı mefrûz-i mezbûru sagīre-i merkūmenin havâicine sarf etmeye ve vakt-i hâcette istidâne edip vakt-i zaferde sagīrenin nafakası kime terettüb ediyorsa ve taleb hakkı kime âidse o kimesneye rücû‘ etmeye mezbûr Ahmed’e izin verdi. Cerâ zâlike ve hurrira fî 23 min Zilka‘de sene [10]81. Şuhûdü’l-hâl: Ali b. Abdullah, Saçlızâde Mustafa Çelebi, Mehmed b. Mahmud, Hüseyin b. Hasan, Mustafa Çelebi b. İsmail ve gayruhüm mine’l-hâzırîn