Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 154 Hüküm no: 181 Orijinal metin no: [34b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Himmet’in vârisleri arasındaki anlaşmazlığın sulhen bittiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Takyeci mahallesinde sâkin iken bundan akdem vefât eden İplikçi el-Hâc Mustafa b. Himmet’in verâseti sulbî kebîr oğlu Hüseyin Çelebi ile sulbiye kebîre kızları Ayşe ve Fâtıma ve Râbia nâm hâtunlara münhasıra olduğu şer‘an zâhir ve müte‘ayyin oldukdan sonra mezbûr Ayşe tarafından husûs-ı âti’z-zikre vekîl olup mezbûrenin zâtını ma‘rifet-i şer‘iyye ile ârifûn olan Ahmed Çelebi b. Ali ve Mehmed Beşe b. İbrahim ve Yusuf Dede b. Hasan şehâdetleri ile şer‘an vekâleti sâbite olan Hamza b. Abdülkerim mahfil-i kazâda işbu sâhibü’l-kitâb mezbûr Hüseyin Çelebi mahzarında bi’l-vekâle ikrâr ve takrîr-i kelâm edip müvekkilem mezbûre Ayşe Hâtun’un babası müteveffâ-yı mezbûrun muhallefâtını verese-i mezkûre beyinlerinde iktisâm murâd eylediklerinde oğlu mezbûr Hüseyin Çelebi müvekkilem mezbûre Ayşe Hâtun’a isâbet eden hisse-i şer‘iyyeden ekser-i eşyâyı ketm ile cevâb vermeğin beyinlerinde münâza‘ât-ı kesîre vâkı‘a olmuşdu, el-hâletü hâzihî müvekkilem mezbûre Ayşe ile merkūm Hüseyin Çelebi beyinlerinde muslihûn tavassut edip müvekkilem mezbûre Ayşe Hâtun’u birâderi mezbûr Hüseyin Çelebi ile da‘vâ-yı mezbûreden mevâni‘den ârî, şerâit-i sıhhat-i sulhu hâvî tehârüc-i şer‘î vechi üzre beş yüz kırk kıt‘a esedî guruş üzerine inşâ-i akd-i sulh eylediklerinde müvekkilem mezbûre Ayşe Hâtun dahi sulh-ı mezbûru kabûl ve bedel-i sulh olan mezbûrü’n-na‘t beş yüz kırk kıt‘a esedî guruşu birâderi mezbûr Hüseyin Çelebi yedinden tamâmen alıp kabz edip husûs-ı mezbûra müte‘allika âmme-i da‘vâ ve nizâ‘dan birâderim mezbûr Hüseyin Çelebi’nin zimmetini ibrâ ve iskāt eyledim, min ba‘d mezbûr vechen mine’l-vücûh da‘vâ ve nizâ‘ım yoktur dedi deyicek gıbbe’t-tasdîk kayd şud. Fî 23 min Zilka‘de sene [10]81. Şuhûdü’l-hâl: Receb Efendi b. Yusuf el-İmâm, Mehmed Çelebi b. Abdülaziz, Eyüb Çelebi b. Mehmed, Hüseyin Çelebi b. Yusuf, Hasan Beşe b. Abdullah, Ahmed Beşe Çukadâr.