Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 154 Hüküm no: 182 Orijinal metin no: [34b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Himmet’in mirasından üvey kızı Raziye’ye diğer vârislerin rızasıyla bir kısım ev eşyasının hibe edildiği Eyüb’de Takyecibaşı mahallesinde sâkin iken bundan akdem vefât eden İplikçi el-Hâc Mustafa b. Himmet’in verâseti sulbî kebîr oğlu Hüseyin Çelebi ile sulbiye kebîre kızları Ayşe ve Fâtıma ve Râbia nâm hâtunlara münhasıra idiği şer‘an zâhir ve müte‘ayyin oldukdan sonra mezbûr Hüseyin Çelebi ve mezbûretân taraflarından husûs-ı âti’z-zikre vekîlleri olup vekâleti zâtlarını ma‘rifet-i şer‘iyye ile ârifûn olan Ahmed Çelebi b. Ali ve Mehmed Beşe b. İbrahim şehâdetleri ile sâbite olan Hamza b. Abdülkerim vekâleten mahfil-i kazâda müteveffâ-yı mezbûrun ümm-i veledi işbu bâ‘ise Râziye bt. Abdullah tarafından ikrâr-ı âti’z-zikri tasdîka vekîl olup bimâ hüve’n-nehcü’s-sübût şer‘an vekâleti sâbite olan Yusuf [Bey] mahzarında her biri bi’l-asâle ve bi’l-vekâle ikrâr ve takrîr-i kelâm edip müteveffâ-yı mezbûr el-Hâc Mustafa hâl-i hayâtında mezbûre Râziye’ye eşyâ-yı memlûkesinden on iki aded dokuma yastık gılafları ile dört döşek, sekiz yemenî yorgan ve sekiz minder gılafı ve bir müsta‘mel kaliçe ve dört müsta‘mel yan keçesi ve beş kapaklı tencere ve on iki sahan ve iki tâbe ve iki kefçe ve bir kazgan ve [vasat] güğüm ve bir leğen ve ibrik ve iki seccâde ve altı aded çarşaf ve bir ihrâm ve bir kırmızı velense ve bir kahve ibriği ve iki ayaklı soba ve sâir esâs-ı beyt ve evânî-i nühâsiye ve gayr-ı nühâsiye ve hırdavât-hânesini hibe ve temlîk ve teslîm ol dahi meclis-i şer‘de ittihâb ve temellük ve her biri tesellüm ve kabûl ve kabz etmişdi, el-hâletü hâzihî müvekkile-i mezbûre Râziye Hâtun, müteveffâ-yı mezbûr [el-Hâc] Mustafa’nın minvâl-i muharrer üzre eylediği hibeyi her birimiz tecvîz ve tenfîz ve husûs-ı mezbûra müte‘allika âmme-i da‘vâdan mezbûre Râziye[’nin] zimmetini ibrâ ve iskāt eyledik min ba‘d mezbûre ile aslâ da‘vâ ve nizâ‘ımız yoktur deyû her biri bi’l-asâle ve bi’l-vekâle ikrâr ve i‘tirâf etmeğin gıbbe’t-tasdîk kayd şud. Fî 23 min Zilka‘de sene [10]81. Şuhûdü’l-hâl: Es-Sâbikūn.