Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 330 Hüküm no: 375 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âlime Hatun bt. Ahmed’in, evini Hafız Abdurrahman Efendi b. Eyüb Efendi’ye sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi Dârü’l-hilâfeti’l-aliyye Kostantıniyye el-mahmiyye’de Ebü’l-feth Sultan Mehmed Hân -aleyhi’r-rahmetü ve’l-gufrân câmi‘-i şerîfi kurbunda Molla Kirmasti mahallesinde sâbıkan Bosna kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî Hâfız Abdurrahman Efendi b. Eyüb Efendi’nin sâkin olduğu menzile varıp zeyl-i rakīmde isimleri terkīm olunan udûl-i müslimîn mahzarlarında akd-i meclis-i şer‘-i mübîn eyledikde mahmiye-i mezbûrede Karagümrük kurbunda Tahtaminâre mahallesi sâkinelerinden fahrü’l-muhadderât Âlime Hâtun bt. Ahmed tarafından mebî‘-i âti’z-zikri teslîme ve semenini kabza vekîl olduğu zâtını ma‘rifet-i şer‘iyye ile ârifân olup zikr olunan Tahtaminâre mahallesi sâkinlerinden olan Hoca İsmail Efendi b. Mehmed ve Yenibahçe kurbunda Mi‘mâr Sinan mahallesi sâkinlerinden olan Mahmud Bey b. İbrahim nâm kimesnelerin şehâdetleri ile şer‘an sâbit olan umdetü kuzâti’l-İslâm zübdetü vülâti’l-enâm Mustafa Efendi b. Hacı Bekir meclis-i ma‘kūd-ı mezbûrede mûmâ-ileyh Hâfız Abdurrahman Efendi mahzarında bi’l-vekâle ikrâr ve takrîr-i kelâm edip müvekkile-i mûmâ-ileyhâ Âlime Hâtun’a bey‘-i âti’l-beyânın sudûruna değin yedinde mülkü ve hakkı olup mahmiye-i mezbûre[de] Hoca Hayreddin mahallesinde vâki‘ bir tarafından merhûm Muhaşşî Şeyhzâde Efendi vakfı olan menzil ve bir tarafdan Sıdkı Efendi veresesi mülkleri ve iki tarafdan tarîk-i âm ile mahdûd hâriciyyesinde fevkānî üç bâb oda ve bir [52a] sofa ve dehliz ve kameriyeli bir tahta-pûş ve bir kenîf ve bir mâbeyn odası ve üzerinde cihan-nümâ ta‘bîr olunur bir köşk ve tahtânî bir hizmetkâr odası ve bir kenîf ve bir ahır ve bir su kuyusu ve havlu ve dâhiliyyesinde üç bâb fevkānî oda ve karşı-be-karşı iki sofa ve dehliz ve tahta-pûş ve bir kiler odası ve camekânlı bir halvetli bir kurnalı bir hamam ve bir kenîf ve tahtânî bir kiler odası ve bir mahtab ve bir bodrum ve bir matbah ve bir aşçı odası ve bir ocaklı oda ve bir sofa ve dehliz ve bir su kuyusu ve cüneyne ve bir kuyu mahzen ve bir kenîfi müştemil menzili tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mûmâ-ileyh Hâfız Abdurrahman Efendi’ye iki bin üç yüz kıt‘a esedî guruşa bey‘ etmiş idi, hâlâ vekâletim hasebiyle menzil-i mahdûd-ı mezkûru müşârün-ileyh Hâfız Abdurrahman Efendi’ye teslîm edip semeni olan meblağ-ı mezkûr iki bin üç yüz kıt‘a esedî guruşu tamâmen yedlerinden alıp kabz eyledim ba‘de’l-yevm menzil-i mesfûr müşârün-ileyh Hâfız Abdurrahman Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe[’t-tasdîki]’ş-şer‘î husûs-ı mezbûru mevlânâ-yı merkūm mahallinde tahrîr ba‘dehû ma‘an irsâl olunan Mustafa ben ile meclis-i şer‘-i hatîr-i lâzımü’t-tevkīre gelip alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâlis min Recebi’l-mürecceb li sene seb‘a ve seb‘în ve elf. Şuhûdü’l-hâl: Umdetü’l-müderrisîni’l-kirâm Atâullah Efendi b. Hüsameddin, mefharü’l-müderrisîn Mehmed Efendi b. Ebûbekir imâm-ı hazret-i kāimmakām Paşa, Şeyhî Mehmed Çelebi b. Ahmed Efendi el-Müderris, mefharü’l-kuzâti’l-islâm Gümüşzâde Yahya Efendi Kadı-i İznikmid muvakkaten, zübdetü’l-kuzât Mustafa Efendi b. Eyüb Efendi, Musli Efendi b. Ahmed Efendi tâbi‘-i Atâullah Efendi, Hüseyin Efendi b. Mehmed el-İmâm, Hüseyin Halîfe b. Receb el-Müderris, Muharrem Efendi b. Mehmed, el-Hâc Hüseyin Ağa b. Halil, İbrahim Çelebi b. Hüseyin ve gayruhüm.