Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 332 Hüküm no: 376 Orijinal metin no: [52a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. es-Seyyid Ali b. es-Seyyid Veli’nin Receb b. Mustafa’da ibrişim bahasından alacağı olduğu Mahmiye-i İstanbul’da Evliyâ Efendi odalarında sâkin es-Seyyid Ali b. es-Seyyid Veli nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Receb b. Mustafa nâm kimesne mahzarında üzerine da‘vâ ve takrîr-i kelâm edip bundan akdem yedimden müşterâ ve makbûz vezni beynimizde ma‘lûm ibrişim bahâsından mezbûr Receb zimmetinde iki yüz yetmiş beş esedî guruş hakkım olup meblağ-ı mezbûrun yüz altmış beş esedî guruşunu târih-i kitâbdan ( ) güne değin te’cîl etmişidim hâlâ müeccel olmayan yüz on esedî guruşu mezbûr Receb’den taleb ederim suâl olunsun dedikde gıbbe’s-suâl mezbûr Receb cevâbında fi’l-vâki‘ müdde‘î-i mezbûra zikr olunan ibrişim bahâsından iki yüz yetmiş beş esedî guruşu târih-i mezbûra dek müeccel olup bâkī yüz on esedî guruşu hâlâ üzerime lâzımü’l-edâ deynimdir deyû ikrâr ve i‘tirâf etmeğin mûcebiyle müeccel olmayan yüz on esedî guruşu müdde‘î-i mezbûr es-Seyyid Ali’ye edâya merkūm Receb’e tenbîh birle mâ vaka‘a bi’t-taleb ketb olundu. Fî gurreti Recebi’l-ferd ve li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, İbrahim Çelebi b. Mehmed, Baba Resul b. Rıdvan, Hüseyin b. Hüseyin ve gayruhüm.