Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 158 Hüküm no: 187 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın Apostol v. Ligori’de olan alacağını ödemesi için Ligori’ye tenbih edildiği Hadâik-i Sultâniye’den Davud Paşa Bahçesi bostânîlerinden sâhibü’l-kitâb Mehmed Bey b. Abdullah mahfil-i kazâda Havâss-ı aliyye kazâsı tevâbi‘inden Litros nâm karye zimmîlerinden Apostol v. Ligori nâm zimmî muvâcehesinde üzerine da‘vâ edip bundan akdem mesfûr Apostol yedimden on sekiz buçuk fıddî esedî guruş istikrâz ve kabz ben dahi ikrâz ve tesellüm edip hâlâ taleb eylediğimde teslîmde ta‘allül eder suâl olunsun deyicek gıbbe’s-suâl ve akībe’l-inkâr müdde‘î-i mezbûr Mehmed Bey’den müdde‘âsını mübeyyine beyyine taleb olundukda hadâik-i mezbûre gılmânından Mustafa b. Ahmed ve Ali b. Abdullah mahfil-i kazâda li ecli’ş-şehâde [hâ]zırân olup istişhâd olunduklarında fi’l-hakīka merkūm Apostol bizim huzûrumuzda müdde‘î-i mezbûr Mehmed Bey’den min ciheti’l-karz zimmetimde lâzımü’l-edâ on sekiz buçuk kıt‘a esedî guruş deynim vardır deyû ikrâr ve ikrâr-ı mezbûra bizi istişhâd eyledi, biz bu husûsa şâhidleriz, şehâdet dahi ederiz deyû her biri berâ-yı edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle zikr olunan on sekiz buçuk fıddî esedî guruşu müdde‘î-i mezbûra edâ ve teslîme mesfûr Apostol’a tenbîh birle kayd şud. Fî 26 min Zilka‘de sene [10]81. Şuhûdü’l-hâl: Mustafa Efendi b. İsmail, Eyüb Çelebi b. Mehmed, Hüseyin b. Ali, Mehmed b. Eyüb, Mehmed b. Mahmud, Ahmed Beşe Çukadâr.