Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 159 Hüküm no: 188 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Hüseyin’in Abdurrahman Bey b. Ahmed’e tarla, çayır ve bahçe satışı Mahmiye-i İstanbul hısnı ebvâbından Edirnekapısı dâhilinde Arab odalarında sâkin Mehmed Çelebi b. Hüseyin meclis-i şer‘de işbu râfi‘ü’l-vesîka Abdurrahman Bey b. Ahmed mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik emlâkimden Havâss-ı Aliyye kazâsına tâbi‘ Çatalca nâhiyesi a‘mâlinden Çanakçı nâm karyede vâki‘ bir tarafı tarîk-i âm, iki tarafı zikr-i âti çayır ve bir tarafı zikr-i câ’î tarla ile mahdûd zât-ı eşcâr-ı müsmire ve gayr-ı müsmireyi ve içinde bir çardağı müştemil mülk bahçeyi cemî‘ tevâbi‘ ve levâhıkı ile mezbûr Abdurrahman Bey’e altı bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz eyledikden sonra merhûm Sultan Bayezid Hân-ı Velî Evkāfı arâzisinden tefvîz-i âtî sudûruna değin zabt ve tasarrufumda olup yine karye-i mezbûre sınırı dâhilinde vâki‘ üç tarafı zikr-i câ’î tarlaya ve bir tarafı tarîk-i âm ile mahdûd tahmînen beş dönüm bir kıt‘a çayırı ve bir tarafı kaldırım başı ve bir tarafı koyun kışlağı ve bir tarafı kurt geçidi, taraf-ı âharı Mestanelik nâm mevzi‘den gelen yola varınca Tepe tarlası demekle ma‘lûm tarla ki birbirine muttasıl beş kıt‘a tarlalarımın hakk-ı tasarruflarını mütevellî-i vakf-ı mezbûr ma‘rifetiyle mezbûr Abdurrahman Bey’e tefvîz on bin fıddî râyic fi’l-vakt akçeye eylediğinde ol dahi tefevvuz ve kabûl edip semen-i mezbûr ile bedel-i merkūm cem‘an on altı bin akçeyi mezbûr Abdurrahman Bey yedinden tamâmen ahz u kabz edip bahçe-i mezbûr ve ol çayır ve tarlalarda alâka ve medhalim kalmadı, müşterî-i mezbûr Abdurrahman Beyefendi’nin mülk-i müşterâsı olmuşdur deyicek kayd şud. Fî 24 min Zilka‘de sene [10]81. Şuhûdü’l-hâl: Hasan Efendi b. Hüseyin, Yusuf Çelebi b. Halil, es-Seyyid Mehmed b. es-Seyyid İbrahim, Mustafa Çelebi, Ahmed b. Mahmud.