Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 159 Hüküm no: 189 Orijinal metin no: [35b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Ali’nin Ayşe bt. Mustafa’ya müştemilatlı ev satışı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Takyecibaşı mahallesinde sâkin el-Hâc İbrahim Çelebi b. Ali meclis-i şer‘de işbu râfi‘ü’l-vesîka Ayşe bt. el-Hâc Mustafa tarafından tasdîka vekîl olup nehc-i şer‘î-i mu‘teber üzre vekâleti sâbite olan Rıdvan Beşe b. Abdullah nâm vekîl mahzarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik emlâkimden mahalle-i mezbûrede vâki‘ bir tarafı Meryem Hâtun bt. Abdülbâkī mülkü ve bir tarafı ba‘zan Ebû Bekir Beşe mülkü ve ba‘zan zevcesi Sâbiha Hâtun mülkü ve bir tarafı el-Hâc Hasan mülkü ve bir tarafı tarîk-i âm ile mahdûd üç bâb fevkānî oda ve bir bâb otluk ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ile müvekkile-i mezbûre Ayşe Hâtun’a otuz üç bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, müvekkile-i mezbûre dahi minvâl-i muharrer üzre iştirâ ve kabûl ve kabz eyledikden sonra semeni olan meblağ-ı mezbûr otuz üç bin akçeyi yedinden bi’t-tamâm ve’l-kemâl ahz u kabz eyledim, min ba‘d menzil-i mahdûd-ı mezkûrda alâka ve medhalim yoktur müvekkile-i mezbûre Ayşe Hâtun’un mülk-i müşterâsı olmuşdur Keyfe mâ yeşâ’ mutasarrıf olsun dedikde gıbbe’t-tasdîk kayd şud. Fî 25 min Zilka‘de sene [10]81. Şuhûdü’l-hâl: Receb Efendi b. Yusuf, Mehmed Çelebi b. Abdülaziz, Hüseyin Bey b. Mehmed, Mustafa Beşe, Mahmud Çelebi b. Mustafa, Ebû Bekir Çelebi, Ahmed b. Rıdvan, Hüseyin b. Ali, Mehmed [b.] Eyüb.