Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 332 Hüküm no: 377 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Atanaz v. Donik’in, Yani ile olan ev davasına Receb Bey’i vekil tayin ettiği Mahmiye-i İstanbul’da Ebî Eyyûb-i Ensârî kapısında Mustafa Paşa mahallesi sükkânından olup tülbentçi tâifesinden olan Atanaz v. Donik nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda bâ‘isü’l-kitâb Receb Bey b. Abdullah nâm bevvâb-ı sultânî mahzarında ikrâr ve takrîr-i kelâm edip mahmiye-i mezbûre[de] Sultan Bayezid Hân -aleyhi’r-rahmetü ve’l-gufrân- câmi‘-i şerîfi ve ma‘bed-i latîfi kurbunda kasab olan Yani nâm zimmî ile mahalle-i mezbûrede vâki‘ beynimizde ma‘lûm menzile müte‘allika da‘vâ ve husûmet ve redd-i cevâba tarafımdan merkūm Receb Bey’i vekîl ve menâbıma nâib nasb ve ta‘yîn eyledim dedikde ol dahi vekâlet-i mezbûreyi kabûl ve merâsimini edâya müte‘ahhid etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâdisi min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Şükrullah Bey b. Mustafa, Süleyman Çelebi b. Hasan, İbrahim Çelebi b. Ahmed ve gayruhüm mine’l-huzzâr.