Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 164 Hüküm no: 196 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muslihiddin Halife’nin merhume Ayşe’ye olan borcunu babasına ödemesi gerektiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Zeyneb Hâtun mahallesinde sâkin işbu sâhibü’l-kitâb İbrahim b. Hüdâverdi mahfil-i kazâda Muslihiddin Halîfe b. İlyas mahzarında üzerine da‘vâ ve takrîr-i kelâm edip bundan akdem fevt olan sulbiye sagīre kızım Ayşe Hâtun’dan mezbûr Muslihiddin Halîfe zimmetinde bin beş yüz akçe olup mezbûre Ayşe fevt olup verâseti bana münhasır olmağla meblağ-ı mezbûru merkūm Muslihiddin Halîfe’den taleb eylediğimde ta‘allül eder suâl olunup alıverilmesi matlûbumdur deyicek gıbbe’s-suâl mezbûr Muslihiddin Halîfe cevâbında müteveffât-ı mezbûre Ayşe Hâtun’dan zimmetimde el-hak dokuz yüz akçe lâzımü’l-edâ deynim vardır deyû ikrârı, mâ‘adâ altı yüz akçeyi inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden mahalle-i mezbûrede sâkin Ali Bey b. Murad ve Mustafa b. Yusuf nâm kimesneler li ecli’ş-şehâde makām-ı kazâya hâzırân olup isre’l-istişhâd merkūm Muslihiddin Halîfe bizim huzûrumuzda sagīre-i mezbûre Ayşe Hâtun’dan zimmetimde bin beş yüz akçe deynim vardır deyû ikrâr ve bizi işhâd eyledi, biz bu husûsa şâhidleriz, şehâdet dahi ederiz deyû her biri edâ-yı şehâdet-i şer‘î eylediklerinde ba‘de’t-ta‘dîl ve’t-tezkiye [şehâdetleri] makbûle olmağın mûcebiyle ve sâbık bin beş yüz akçeyi müteveffât-ı [mezbûrenin] bi’l-inhisâr vârisi müdde‘î-i mezbûra edâ ve teslîme tenbîh birle kayd şud. Fî 2 min Zilka‘de sene [10]81. Şuhûdü’l-hâl: Hüseyin b. Hasan, Hüseyin b. Ali, Ahmed Beşe Çukadâr, Dilaver b. Abdullah, Eyüb Çelebi el-müsta‘id.