Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 165 Hüküm no: 198 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hanım bt. Mustafa Paşa’nın vekili Mahmud Ağa vasıtasıyla Şeyh Abdülbâki es-Sivâsî’nin damadına gayr-i menkul ve eşya rehin alarak verdiği borç Husûs-ı âti’z-zikrin mahallinde tahrîri iltimâs olunmağın küttâb-ı mahkeme-i muhkemetü’l-beyândan fahrü’l-müderrisîn Mevlânâ Salih Mehmed Efendi b. Mehmed irsâl olunup ol dahi zeyl-i vesîkada muharrerü’l-esâmî müslimîn ile medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de Nişâncı Paşa mahallesi sükkânından umdetü’l-vâsılîn, zübdetü’s-sâlikîn eş-Şeyh Abdülbâkī Efendi b. el-merhûm, el-mebrûr, ed-dâricü ilâ medârici rahmeti Rabbihi’l-Ganî Abdülmecid Efendi es-Sivâsî hazretlerinin bahçelerine gidilip inde’l-vadî‘ ve’ş-şerîf akd-i meclis-i şer‘-i münîf olundukda Dergâh-ı âlî -dâme mahfûfen bi’l-me’âlî- kapıcıbaşılarından iftihârü’l-emâcid ve’l-ekârim, câmi‘ü’l-mehâmid ve’l-mekârim mûmâ-ileyh eş-Şeyh Abdülbâkī Efendi’nin dâmâd-ı mükerremleri Zülfikār Ağa b. Selim meclis-i ma‘kūd-ı mezkûrda ile’l-ân vâli-i vilâyet-i Mısr-ı Kahire olan vezîr-i debîr-i mükerrem İbrahim Paşa Hazretleri’nin nükūd-ı mevkūfelerine bi’l-fi‘l mütevellî olup mahmiye-i İstanbul’da Vefâ semtinde sâkin olup evlâd-ı sıgārının tesviye-i umûru için kıbel-i şer‘den mansûb vasî olan umdetü’l-muhadderât, zübdetü’l-muvakkarât Emine Hanım ibnetü’l-merhûm Seyyid Mustafa Paşa kıbelinden husûs-ı âti’z-zikre vekîl olup hasm-ı şer‘î-i câhid mahzarında müşârun-ileyhânın zâtını ma‘rifet-i şer‘iyye ile ârifân olan İbrahim Bey b. Mehmed ve Hamza Bey b. Yusuf şehâdetleriyle şer‘an vekâletleri sâbite olan kıdvetü’l-emâsil ve’l-akrân zübdetü’l-emâcid ve’l-a‘yân Mahmud Ağa b. Sefer el-Cündî muvâcehesinde ikrâr-ı tâm ve takrîr-i kelâm edip mütevellî-i mûmâ-ileyh Mahmud Ağa yedinden işbu târih-i kitâb senesi Zilhiccesi gurresinden onu, on bir buçuk hesâbı üzre altı ay tamâmına değin yüz elli kıt‘a esedî guruş murâbaha üzerime devr-i şer‘î ilzâm olunan iki bin kıt‘a esedî guruş ve yine müvekkil-i müşârun-ileyhâ Emine Hanım’ın vasîleri bulunduğu evlâd-ı sıgārı malından târih-i mezbûrdan onu on iki hesâbı üzre yedinden bahâ-yı muharrer üzre altı ay tamâmına değin üç yüz kıt‘a esedî guruş murâbaha üzerime devr-i şer‘î ilzâm olunan üç bin kıt‘a esedî guruş vekîl-i mûmâ-ileyh Mahmud Ağa yedinden cem‘an beş bin kıt‘a esedî guruş istirbâh ve kabz edip ol dahi bi’l-velâye iki bin esedî ve bi’l-vekâle üç bin esedî ki cem‘an beş bin esedî guruş bana irbâh ve teslîm ve minvâl-i meşrûh üzre mâleyn-i mezbûreyni üzerime devr-i şer‘î ve ilzâm-ı ribh eylediğinden sonra mâleyn-i mezbûreyn mukābelesinde eşyâ-yı memlûkümden bir gömlek ile tahta sırt samur ve yine bir gömlek ile tahtına kafa samur ve al çukaya kaplı bir müsta‘mel sırt samur kürk, elvân renkli çukaya kaplı bir müsta‘mel sırt samur kürk ve mor çukaya kaplı bir müsta‘mel sırt samur kürk ve …? çukaya kaplı bir müsta‘mel sırt samur kürk ve serâser kaplı bir müsta‘mel sırt dîvân kürkü ve sîm palan ve sîm ökselik ve sîm zencirî ile bir dîvân rahtı ve bir müsta‘mel dîvân abâyisi ve beş aded sîm topuz ve bir sîm hayderî çerkesî raht ve bir altın gaddâre ve al çuka üzerine sırma ile münakkaş bir zilpûş ve al çuka üzerine sırma ile münakkaş bir ocak perdesi ve ala çuka üzerine sırma ile münakkaş bir kapı perdesi ve bir kırmızı kadife şalvar ve kırmızı atlas üzerine sırma ile münakkaş iki aded yastık ve dört aded hafif Şam dikdiği ve beyaz üzerine bir çift sûzenî mak‘ad ve kırmızı kadife üzerine bir sırmalı tirkeş ve iki sîm şamdan ve bir sîm leğen ve bir sîm ibrik ve bir sîm kahve ibriği ve iki sîm gülâbdan buhûrdanlarını üç sîm fincan tabağı ve bir sîm na‘lbeki ve bir sîm kadeh ki cem‘an altı buçuk vakıyye sîm evânîsi ve iki sîm köhne eyer ve sekiz aded inci yakalık ve bir mücevher ön kuşak ve bir çift zümrüt küpe ve bir elmas hâtem ve üç taşlı bir zümrüt hâtem ve on bir aded altın düğme ve dokuz aded Hind kutnisi ve iki zirâ‘ atlas ve dört elvân-ı mütenevvi‘a Hind alacası ve dokuz Şam alacası ve bir Mardin perdesi ve bir Mardin peşkiri ve dört harîr peşkiri ve bir kırmızı hâre kaftan zerli ve bir sarı kutni kaftan zerli ve beş hil‘at ve otuz dört buçuk donluk elvân atlas ve dört Haleb atlası ve iki Sakız kemhâsı ve bir beyaz hatâyî ve bir mâî Şam hâresi ve üç telli hatâyî ve bir beyaz çeşm-i bülbül ve elvân-ı mütenevvi‘a altmış altı zirâ‘ Londrine çuka ve dört donluk elvân sâye çuka ve yüz yirmi iki zirâ‘ telli dîbâ ve dokuz aded münakkaş hamam rahtı ve iki beyaz Serfice peşkiri zerli ve bir zerre-i mükemmel ki işbu eşyâyı mütevellî ve vekîl-i mûmâ-ileyh Mahmud Ağa yedine rehine vaz‘ ve teslîm, ol dahi irtihân ve bi’l-cümle tesellüm ve kabz eyledi dedikde gıbbe’t-tasdîki’l-mu‘teber müşârun-ileyh Zülfikār Ağa’nın kayınatası mûmâ-ileyh Şeyh Abdülbâkī Efendi meclis-i mezbûrda müşârun-ileyh Mahmud Ağa mahzarında ikrâr eder ki silk-i mülkünde münselik mahalle-i mezbûrede vâki‘ işbu bir tarafı mahalle-i mezbûre imâmına meşrût ve ba‘zan Pabûşî Ahmed mülkü ve ba‘zan tarîk-i âm ve ba‘zan câmi‘-i şerîf mukābelesinde olan yol ve bir tarafdan ba‘zan a‘lemü’l-ulemâ Kadızâde bahçesi ve ba‘zan ( ) mülkü ve iki taraf tarîk-i âm ile mahdûd mülk bahçeyi cemî‘ tevâbi‘iyle dâmâdım mezbûr Zülfikār Ağa’nın deyn-i mezkûr mukābelesinde kendi rızâm ile müşârun-ileyh Mahmud Ağa yedine rehine vaz‘ ve teslîm, ol dahi ba‘de’t-tescîli’ş-şer‘î irtihân ve tesellüm ve kabûl eyledi deyû buyurduklarında gıbbe’t-tasdîki’l-mu‘teber mûmâ-ileyh Zülfikār Ağa ve şeyh-i müşârun-ileyh meclis-i mezbûrda i‘âde-i kelâm edip bâlâda mezkûr iki bin esedî mâl-ı vakfı ve üç bin esedî mâl-ı yetîmi zikr olunduğu üzre târih-i kitâb senesi Zilhiccesi gurresinden altı ay tamâmına değin mütevellîsi mûmâ-ileyh ve vekîl-i müşârun-ileyh Mahmud Ağa’ya asıl ve fer‘leriyle edâ ve teslîm olunmaz ise zikri sâbık bahçemizi semen-i misilleri ile bey‘ ve eşyâ-yı mezbûru edâ ve bâkī kalır ise bize def‘ ve teslîme işbu hâzır bi’l-meclis Molla Aşkî mahallesi müezzini Ahmed Efendi b. Abdurrahman her birimiz tarafımızdan azl ve in‘izâlden masûne vekâlet-i devriye ile vekîl ve nâib-i menâb nasb ve ta‘yîn eyledik dediklerinde mezbûr Ahmed Efendi dahi vekâlet-i mezbûreyi kabûl ve hıdemât-ı lâzımesini edâya ta‘ahhüd ve iltizâm etmeğin vâki‘ü’l-hâl mevlânâ-yı mezbûr mahallinde tahrîr ba‘dehû ma‘an ba‘s olunan Ahmed Beşe ve Musa Çelebi ile meclis-i şer‘a gelip alâ vukû‘ihî inhâ ve takrîr etmeğin mâ vaka‘a kayd şud Fî 25 Zilka‘de sene [10]81. Şuhûdü’l-hâl: Ahmed Ağa b. Hüseyin, Seyyid Mehmed Çelebi b. Seyyid İsmail, İbrahim Çelebi, Mehmed Efendi, Diğer Mehmed Efendi, Ahmed Bey, Mustafa Efendi Nâib-i …?, Mehmed b. Eyüb.