Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 333 Hüküm no: 378 Orijinal metin no: [52a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkādir Çelebi b. Mehmed’in, yanmış evinin enkazı ve arsasını Gazanfer Ağa b. Nasuh’a sattığı Dârü’l-hilâfeti’l-aliyye Kostantıniyye el-mahmiyye’de Saray-ı cedîd-i sultânî’de hâne-i sagīrede sâkin iç oğlanlarından Abdülkādir Çelebi b. Mehmed tarafından husûs-ı âti’l-beyâna vekîl olduğu saray-ı mezkûrda vâki‘ odun anbarında sâkin teberdârândan Ahmed Bey b. Abdülkādir ve Mehmed Bey b. Mustafa nâm kimesneler şehâdetleriyle şer‘an sâbit olan umdetü’l-müderrisîni’l-kirâm Sunullah Efendi b. el-merhûm Şeyh İsmail Efendi ile müvekkil-i mezbûrun li ebeveyn karındaşı Mustafa nâm kimesnelerden her biri vekâleten ve asâleten meclis-i şer‘-i şerîf-i Ahmedî ve mahfil-i dîn-i münîf-i Muhammedî’de işbu bâ‘isü’l-kitâb fahrü’l-akrân ve’l-ekfâ Gazanfer Ağa b. Nasuh mahzarında ikrâr ve takrîr-i kelâm edip mahmiye-i mezbûrede Hacı Hamza mahallesinde vâki‘ bir tarafdan mezbûr Gazanfer Ağa’nın zevcesi Hatice Hâtun bt. Mustafa mülkü ve bir tarafdan Receb Beşe mülkü ve iki tarafı tarîk-i âm ile mahdûd binâsı muhterik mülk menzil arsası üzerinde mevcûd olan nukzu ile tarafeynden îcâb [ve] kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi safkatin vâhidetin yüz doksan kıt‘a esedî guruşa mûmâ-ileyh Gazanfer Ağa’ya bey‘ ve teslîm edip ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezkûr yüz doksan kıt‘a esedî guruşu tamâmen alıp kabz eyledik, ba‘de’l-yevm arsa-i mahdûde-i mezbûre üzerinde olan nukz-ı mevcûdu ile mûmâ-ileyh Gazanfer Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb ve imlâ olundu. Fi’l-yevmi’r-râbi‘ min Recebi’l-mürecceb li sene seb‘a ve seb‘în ve elf. Şuhûdü’l-hâl: Hacı Durmuş b. Memi, Hüseyin Ağa b. İsmail, Receb Beşe b. Abdullah, Mehmed Beşe b. İslâm, Ali Bey b. İslâm, Bakkal Abdurrahman Çelebi, Berber üstâd Ali b. ( ), Hüseyin b. Abdullah, Murad Beşe b. Ali, el-Hâc İsa b. Ömer, Mehmed Çelebi b. Abdullah, Süleyman Çelebi b. Hasan