Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 333 Hüküm no: 379 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed Çelebi’nin babası tarafından kendine verilen vekâleti, başka bir şehre gitmesi üzerine İmam Abdullah Efendi’ye bıraktığı El-emru hasbe mâ zükire fîh nemekahû el-fakīru ileyh sübhânehû ve te‘âlâ es-Seyyid Cafer b. Kemaleddin el-Müvellâ hilâfeten bi medîneti Kostantıniyye el-mahmiyye Mahmiye-i İstanbul’da Dülgerzâde mahallesinde sâkin es-Seyyid Mehmed Çelebi b. es-Seyyid Hüseyin Çelebi Efendi meclis-i şer‘-i hatîrde işbu bâ‘isü’l-vesîka İmâm Abdullah Efendi b. Mehmed nâm kimesne mahzarında ikrâr ve takrîr-i kelâm edip babam mezbûr es-Seyyid Hüseyin Efendi bundan akdem medîne-i Edirne’ye mülâzemet etmek için gider oldukda mahalle-i mezkûrede vâki‘ lede’l-ahâlî ve’l-cîrân ma‘lûmü’l-hudûd mülk menzilini semen-i misli ile âhara bey‘ ve kabz-ı semene ve ba‘de’l-kabz mahmiye-i mezbûrede vâki‘ merhûme Âişe Hâtun vakfı’na zimmetinde deyn olan yüz esedî guruşu mütevellîsi olan işbu hâzır bi’l-meclis Ahmed Efendi b. Abdurrahman’a edâ ve teslîme ve meblağ-ı mezbûr mukābelesinde mütevellî-i mezkûra rehn vaz‘ ve teslîm eylediği bir Mushaf-ı şerîf ile bir mecmû‘a ve mahtûm deyn temessükünü mütevellî-i mezkûrdan ahz u kabza ve menzil-i mezbûrun semeninden fazla kalanı kendi[ye] îsâle ve ahz ve îsâl mütevakkıf olduğu umûrun küllîsine beni tarafından vekîl-i mutlak ile vekîl nasb ve ta‘yîn eyledikde ben dahi vekâlet-i mezbûreyi kabûl ve hizmet-i lâzımesin edâya ta‘ahhüd etmişidim, lâkin ben dahi iktizâ hasebiyle âhar diyâra gitmek lâzım gelmeğin mezbûr Abdullah Efendi tarafından vech-i meşrûh üzre zikr olunan menzil semen-i misli ile bey‘ ve kabz-ı semene ve ba‘de’l-kabz vakf-ı mezbûra deyn olan meblağ-ı mezbûr yüz guruşu mütevellî-i mezkûra edâ ve teslîm ve mütevellî-i mezkûrun yedine vaz‘ olan ve hâne-i mezkûre ile mahtûm deyn temessükünü mütevellî-i mezbûrdan ahz u kabz ve menzil-i mezbûrun semeninden fazla kalanı bana îsâle ve ahz ve îsâl mütevakkıf olduğu umûrun küllîsine vekîl ve menâbıma nâib nasb ve ta‘yîn eyledim dedikde mezkûr İmâm Abdullah Efendi dahi vekâlet-i mezkûreyi kabûl ve merâsimini kemâ yenbağī edâya ta‘ahhüd eyledi dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilevvel li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Veli Bey b. Mahmud, Baba Resul b. Rıdvan ve gayruhüm.