Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 184 Hüküm no: 221 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küçükçekmece reâyâsından defter mucebinde sürsat akçesi alınıp fazladan teklif yüklenmemesi Akzâ kuzâti’l-müslimîn, evlâ vülâti’l-muvahhidîn, ma‘denü’l-fazlı ve’l-yakīn, vâris-i ulûmi’l-enbiyâi ve’l-mürselîn, hüccetü’l-Hakkı ale’l-halkı ecma‘în el-muhtâs bi mezîdi inâyeti’l-meliki’l-mu‘în Mevlânâ Haslar kadısı -zîde fezâilühû- tevkī‘-i refî‘-i hümâyûn vâsıl olıcak ma‘lûm ola ki kazâ-yı mezbûre muzâfâtından Küçükçekmece re‘âyâsı hâlâ ordu-yı hümâyûnuma âdem ve arz-ı hâl gönderip bir asker-i İslâm için tahsîli fermân olunan sürsat ber mûceb-i emr ve defter edâ edip lâkin hîn-i tevzî‘de celb-i mâl için sürsat zahîresini her karyenin tahammülüne göre tevzî‘ etmeyip ba‘zı karyelere noksan ve ba‘zı karyelere ziyâde tahmîl edip ta‘addî ederler deyû bildirip, her karyenin hallerine ve tahammüllerine göre tevzî‘ olunup kimesneye ta‘addî ve tecâvüz ettirilmemek bâbında emr-i şerîfim ricâ eyledikleri ecilden imdi vech-i meşrûh üzre amel olunmak fermânım olmuşdur buyurdum ki hükm-i şerîfim vardıkda husûsu mezbûra mukayyed olup göresiz nâhiye-i mezbûreden ihrâcı fermânım olan sürsat zahîresi her karyenin tahammülüne göre a‘lâ ve ednâ ve evsât i‘tibârıyla tevzî‘ olunup ba‘zısına ziyâde ve ba‘zısına noksan üzre tevzî‘ olunup ta‘addî olunduğu mukarrer ise ol takdîrce her karyenin hâline ve tahammüllerine göre hak ve adl üzre tevzî‘ ettirip zulm ve ta‘addîden be gāyet ihtirâz eyleyesiz. Fi’l-yevmi’s-sâdis [min] şehri Saferi’l-hayr sene ihdâ ve semânîn ve elf. Vasale ileynâ fi’l-yevmi’l-âşir min Ramazân seneti’l-mezbûre.