Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 185 Hüküm no: 222 Orijinal metin no: [42a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küçükçekmece ve Eyüp reâyâsından mevkûfat defter mucebinde sürsat akçesi alınıp fazladan vergi yüklenmemesi Akzâ kuzâti’l-müslimîn, evlâ vülâti’l-muvahhidîn, ma‘denü’l-fazlı ve’l-yakīn, vâris-i ulûmi’l-enbiyâi ve’l-mürselîn, hüccetü’l-Hakkı ale’l-halkı ecma‘în el-muhtâs bi mezîdi inâyeti’l-meliki’l-mu‘în Mevlânâ Haslar kadısı -zîde fazluhû- tevkī‘-i refî‘-i hümâyûn vâsıl olıcak ma‘lûm ola ki Küçükçekmece nâhiyesi ahâlîsi hâlâ ordu-yı hümâyûnuma arzuhâl sunup nâhiye-i mezbûre re‘âyâsı zebûn ve fakirü’l-hâl olup mürûr ve ubûr eden kapıcıbaşı ve elçi ve sâir fermân-ı şerîf ile vâki‘ olan mesârif ve tekâlîfi bi’t-tamâm edâ edip lâkin Haslar kazâsı re‘âyâsı bizim ile ma‘an vâki‘ olan sürsat ve iştirâyı çekegelip ve sâir mesârifi vermekde ta‘allül ve inâd eylediklerin bildirip inâyet ricâ eyledikleri ecilden hazîne-i âmirede mahfûz olan mevkūfât defterlerine nazar olundukda nâhiye-i Küçükçekmece ma‘a Eyyûb-i Ensârî sürsat ve iştirâya dâhil olduğu mastûr ve mukayyed bulunmağın imdi vech-i meşrûh üzre amel olunmak fermânım olmuşdur, buyurdum ki hükm-i şerîfim vardıkda bu bâbda sâdır olan emrim üzre amel edip dahi defterde mastûr olduğu üzre vâki‘ olan sürsat ve iştirâyı Küçükçekmece ma‘a Eyyûb-ı Ensârî ahâlîleri ile edâ ettirip hilâf-ı emr-i şerîf kimesneye ta‘allül ve nizâ‘ ettirmeyesiz şöyle bilesiz, alâmet-i şerîfe i‘timâd kılasız. Tahrîren fi’l-yevmi’t-tâsi‘ aşer [min] şehri Saferi’l-hayr sene ihdâ ve semânîn ve elf. Be makām-ı mahrûse-i Edirne. Vasale ileynâ fi’l-yevmi’l-hâmisi aşer min Ramazân seneti’l-mezbûre. Derkenâr: Yedlerinde olan emr-i şerîf-i âlîşân mûcebince vâki‘ olan tekâlîfi ma‘an çekeler, ta‘allül ettirilmeye deyû buyruldu.