Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 185 Hüküm no: 223 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dârüssaâde Ağası Abbas Ağa’nın vakıf hamamına tahsis olunan Kırkçeşme sularından iki buçuk lüle suyun tekrar ölçümünün yapıldığı Hâlâ Dârü’s-sa‘âdeti’ş-şerîfe ağası olan umdetü’l-efâhim ve’l-e‘âlî sâhibü’l-me’âsir ve’l-me‘âlî rüknü’l-ganiyyeti’l-aliyyeti’s-sultâniyye, mukarribü’l-hazret-i’s-seniyyeti’l-hâkāniyye, el-mevsûf bi meratibi’ş-şiyem ve mekârimi’l-ahlâk, el-ma‘rûf bi mehâsini’l-kerem fî eknâfi’l-âfâk Hazret-i Abbas Ağa b. Abdürrezzak hazretlerinin hizmetiyle şeref-yâb ve evkāf-ı şerîfelerine meşrûtiyyet üzre bi’l-fi‘l mütevellî olan bâ‘isü’l-vesîka Cafer Ağa b. Mehmed nâm bevvâb-ı sultânî meclis-i şer‘-i hatîr-i lâzımü’t-tevkīrde takrîr-i kelâm edip ağa-yı müşârun-ileyh hazretleri Haslar kazâsına tâbi‘ Terkos nâhiyesinde Kırk Çeşme Suyu başında Selhhâne Deresi nâm vâdîden nübû‘ ve taşra denize cereyân eden mâ’i, vâdî-i mezbûrdan iki dağ aşırıp lağım ve bacalar ile beyne’n-nâs Çifte Havuz demekle ma‘rûf havuza karîb Tobus Pınarı nâm vâdîye izn-i sultânî ile zikr olunan Çifte Havuz’a nasb olan Kırk Çeşme Suyu’na ilhâk ve mahmiye-i İstanbul’da müceddeden binâ ve ihyâ ve vakf buyurdukları hamama icrâ buyurmuşlar idi, el-hâletü hâzihî mâ’-i mezkûrun üzerine varılıp ne mikdâr su mevcûd olduğu vezn ve ayâr ve keşf ve tahrîr olunmak matlûbumdur dedikde bu fakîr ve hâssa mi‘mârbaşısı olan iftihârü’l-emâcid ve’l-ekârim, câmi‘ü’l-mehâmid ve’l-mekârim Mustafa Ağa b. İbrahim ve hâssa suyolu nâzırı umde’l-a‘yân ve’l-e‘âlî Ali Ağa b. Nurullah ve hâssa suyolcularının kethüdâsı olan Veli Bey b. Ramazan ve suyolcularından el-Hâc Abbas b. Ahmed ve el-Hâc Abdülganî b. Abdullah ve el-Hâc Mustafa b. Hasan ve Uzun Usta Mehmed b. Abdülkerim ve zeyl-i vesîkada isimleri mastûr müslimîn ile zikr olunan mevzi‘a varılıp fi’l-vâki‘ mâ’-i mezkûr otuz iki aded boş baca ve altı aded ma‘mûr baca ve altı yüz altmış altı kulacık lağım ile ihdâs olunan suyolu ile sâlifü’z-zikr Tobus Pınarı Deresi’nden gelip havz-ı mezbûra mansab olan suya ilhâk olunduğu mu‘âyene ve müşâhede olundukdan sonra suyolculara mahsûs ve mu‘ayyen mi‘yâr ile mâ’-i mezkûr mahall-i mezbûrda vezn ve ayâr olundukda kâmil üç lüle mâ’-i hâlis mevcûd olup ber mu‘tâd-ı kadîm nısf lülesi hakk-ı mecrâ verilip hamamlara ancak iki buçuk lüle su vâsıl olur deyû müşârun-ileyh Mi‘mârbaşı el-Hâc Mustafa Ağa ve mûmâ-ileyh Nâzır Ali Ağa ve mezbûrûn suyolcular icmâ‘ ve ittifâk eylediklerinde mâ vaka‘a ketb olundu. Evâhiri Şa‘bânü’l-mu‘azzam sene ihdâ ve semânîn ve elf. Şuhûdü’l-hâl: İbrahim Efendi Muhâsebeci, Mukāta‘acı Ali Efendi, Süleyman Ağa b. Hazret-i Kethüdâ Ağa, Hasan Bey b. Süleyman, el-Hâc Mehmed Bey b. Mustafa, Ömer Beşe b. İbrahim, Mahmud Beşe b. Abdullah, Ömer Beşe b. Mustafa, Osman Bey b. Halil, Mustafa Bey b. Ali, el-Hâc Mustafa, Mehmed Bey b. Ali el-emru hasbemâ