Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 334 Hüküm no: 380 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in, Halil b. Mustafa’dan muhâlaa yoluyla boşandığı Mahmiye-i İstanbul’da Mahmud Paşa mahallesinde sâkine Fâtıma bt. Mehmed nâm hâtun dîvân-ı eyvân-ı adâlet-ünvânda ma‘kūd meclis-i şer‘-i şerîfde sâbıkan zevci olan râfi‘ü’l-kitâb Halil b. Mustafa nâm kimesne mahzarında üzerine da‘vâ ve takrîr-i kelâm edip merkūm Halil mukaddemâ zevcim olup târih-i kitâbdan sekiz ay mukaddem beni bâyinen tatlîk etmeğin zimmetinde mütekarrir ve ma‘kūdun-aleyh olan bin üç yüz fıddî râyic fi’l-vakt akçe mehr-i müeccelimi hâlâ merkūm Halil’den taleb ederim suâl olunsun dedikde gıbbe’s-suâl merkūm Halil cevâbında fi’l-vâki‘ mezbûre Fâtıma mukaddemâ zevcem olup târih-i mezbûrda merkūme Fâtıma zimmetimde mütekarrir ve ma‘kūdun-aleyh olan meblağ-ı mezbûr bin üç yüz akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerlerine olmak üzre benimle muhâla‘a-i sahîha-i şer‘iyye ile muhâla‘a edip ben dahi hul‘-ı mezbûru kabûl eyledikden sonra her birimiz zevciyyete müte‘allik da‘vâdan âharın zimmetini ibrâ ve iskāt etmişidik deyû def‘le mukābele edicek gıbbe’l-istintâk ve’l-inkâr merkūm Halil’den def‘-i mezbûrunu mübeyyine beyyine taleb olundukda udûl-i müslimînden olup mahmiye-i mezbûrede Kumkapı kurbunda Süleyman Ağa mahallesi sükkânından müezzin Halil Halîfe b. Musa ve diğer Halil b. Abdünnebi nâm kimesneler li ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müdde‘iyye-i mezbûre Fâtıma târih-i kitâbdan sekiz ay mukaddem zevci merkūm Halil zimmetinde mütekarrir ve ma‘kūdun-aleyh olan bin üç yüz akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâ dahi kendi üzerine olmak üzre merkūm Halil bizim huzûrumuzda muhâla‘a-i sahîha-i şer‘iyye ile muhâla‘a edip merkūm Halil dahi hul‘-ı mezbûru kabûl eyledikden sonra zevciyyete müte‘allika da‘vâdan her biri âharın zimmetini ibrâ ve iskāt eyledi biz husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince merkūme Fâtıma bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâmis min Recebi’l-mürecceb li sene seb‘a ve seb‘în ve elf. Şuhûdü’l-hâl: Şaban Ağa b. Süleyman Ser-muhzırân, Eyüb Ağa Kethüdâ-yı hazret-i efendi, Mustafa Beşe Çukadâr, Mehmed Çelebi b. Abdullah.