Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 186 Hüküm no: 224 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küçükçekmece, Eyüp ve Hasköy reâyâsından sürsat usulü toplanan arpayı eda edip ihmal ve haksızlığa meydan verilmemesi Düstûr-ı mükerrem, müşîr-i mufahham, nizâmü’l-âlem, müdebbir-i umûru’l-cumhûr, bi’l-fikri’s-sâbık, mütemmim-i mehâmmü’l-enâm bi’r-re’yi’s-sâ’ib, el-mahfûf bi sunûfi avâtıfi’l-meliki’l-a‘lâ Âsitâne-i sa‘âdetimde kāimmakāmım olan Vezîr İbrahim Paşa -edâmallâhu iclâlehû- ve kâdı’l-kuzâti’l-müslimîn, evlâ vülâti’l-muvahhidîn, ma‘denü’l-fazlı ve’l-yakīn, vâris-i ulûmi’l-enbiyâi ve’l-mürselîn, hüccetü’l-Hakkı ale’l-halkı ecma‘în el-muhtâs bi mezîdi inâyeti’l-meliki’l-mu‘în Mevlânâ Haslar kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki Haslar kazâsı muzâfâtından Küçükçekmece re‘âyâsı hâlâ ordu-yı hümâyûnuma âdem ve arzuhâl gönderip mezbûrlar bin seksen senesinde fermânım olan sürsat iştirâsı zahîresin hisselerine düşen cümle karye re‘âyâsıyla edâ edip lâkin kazâ-yı mezbûra tâbi‘ mezbûrlar ile ma‘an ve iştirâ arpasın vermek üzre deftere kayd olunan Eyyûb-ı Ensârî ve Hasköy ahâlîsi hisselerine düşen iki yüz elli kile arpayı vermemek için ellerine hüccet alıp vermekde ta‘allül eylediklerin i‘lâm eyledikleri ecilden hazîne-i âmiremde mahfûz olan mevkūfât defterlerine nazar olundukda bundan akdem bin seksen senesinde Selânik Kışlağı için her bir kilesi on ikişer akçeye olmak üzre Eyyûb-ı Ensârî ve Hasköy karyesi ve Küçükçekmece ile ma‘an bin kile şa‘îr iştirâsı fermânım olduğu mastûr olmağın imdi mezbûrlar hisselerine düşen şa‘îri edâ edip bir vechile ta‘allül ve nizâ‘ ettirmiyesin deyû fermânım olmuşdur buyurdum ki, hükm-i şerîfimle vardıkda bu bâbda sâdır olan emrim üzre amel edip dahi târih-i mezbûrda Selânik Kışlağı için iştirâsı fermânım olan bin İstanbul kilesi şa‘îr Eyyûb-ı Ensârî ve Hasköy karyesi ve Küçükçekmece ahâlîsi ile ma‘an kayd olunmağla mezbûrların kānûn ve defter mûcebince hisselerine düşen şa‘îri Küçükçekmece ahâlîsi ile ma‘an edâ ettirip elimizde hüccetimiz vardır deyû kimesneye ol vechile ta‘allül ve nizâ‘ ettirmeyip ihkāk-ı hak eyleyesin, husûs-ı mezbûr için bir dahi şikâyet olunmalı eylemiyesin şöyle bilesin, alâmet-i şerîfe i’timâd kılasın. Fî 4 min Receb sene [10]81. Be yurd-ı Sahrâ-yı Vidin. Vasale ileynâ fî 20 min Şa‘bân sene [10]81.