Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 69 Hüküm no: 8 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Abdullah’ın evini Sefer’in oğlu Ömer ve İbrahim’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Kasım Paşa mahallesinde sâkin Mustafa Bey b. Abdullah nâm kimesne, meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ömer ve İbrahim ibney Sefer mahzarlarında tâyi‘an ikrâr-ı tâm ve takrîr-i kelâm edip akd-i âtî sudûruna değin silk-i mülk ve zabt ve tasarrufumuzda olup mahalle-i mezbûrede vâki‘ bir tarafdan Fâtıma Hâtun bt. Ali mülkü ve bir tarafdan ba‘zan mezbûre Fâtıma Hâtun’un mülkü olan sirkeci dükkânı ve ba‘zan Ali Çelebi b. Ebûbekir mülkü ve ba‘zan tarîk-i âm ile mahdûd üç bâb fevkānî odaları ve matbah ve sofa ve ahırı ve bi’r-i mâyı ve cüneyneyi müştemil menzilde olan on bir sehim hisse-i şâyi‘amı cemî‘ hukūk ve merâfıkı ile mezbûrân Ömer ve İbrahim’e on yedi bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi ale’l-iştirâki’s-seviy mutasarrıf olmak üzre iştirâ ve tesellüm ve kabûl eylediklerinden sonra semeni olan meblağ-ı mastûr on yedi bin akçeyi mezbûr Ömer ve İbrahim yedlerinden bi’t-tamâm ve’l-kemâl ahz ve kabz eyledim min ba‘d zikr olunan on bir sehim hisse-i şâyi‘am mezbûrân Ömer ve İbrahim’in mülk-i müşterâlarıdır keyfe mâ yeşâ’ân ve yahtârân mutasarrıfân olsunlar dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’s-sâlis min şehri Recebi’l-ferd li sene tis‘în ve elf. Şuhûdü’l-hâl: Çelebi b. ( ), Abdullah Çelebi b. Mustafa el-Müezzin, Veli Bey b. Mehmed, Mustafa Çelebi b. Cafer, Hüseyin Çelebi b. ( ) Habbâz, İbrahim Beşe b. Mehmed Berber, hayyât ( ) b. Hasan Bey, Mustafa Halîfe b. Musa, Hüseyin Bey b. ( ).