Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 70 Hüküm no: 9 Orijinal metin no: [3a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in tarlalarını Selim Beşe b. Ferhad’a devretmesi Vilâyet-i Rumeli’nde İstirdade? kazâsına tâbi‘ Beragoş nâm karye ahâlîsinden Mehmed b. Ahmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Selim Beşe b. Ferhad nâm kimesne mahzarında tâyi‘an ikrâr-ı tâm ve takrîr-i kelâm edip tefvîz-i âti’z-zikrin sudûruna değin taht-ı yedimde ve zabt ve tasarrufumda olup karye-i merkūme sınırı dâhilinde mevâzi‘-i müteferrikada vâki‘ lede’l-ahâlî ve’l-cîrân ma‘lûmü’l-hudûd ve’l-kıta‘ tarlalarımın hakk-ı tasarruflarını ma‘rifet-i sâhib-i arz ile mezbûr Selim Beşe’ye üç bin beş yüz fıddî râyic fi’l-vakt akçe bedel mukābelesinde tefvîz ve ferâğ edip ol dahi ber vech-i muharrer tefevvuz ve kabûl eyleyip bedel-i ferâğ olan meblağ-ı mesfûr üç bin beş yüz akçeyi merkūm Selim Beşe yedinden bi’t-tamâm ve’l-kemâl ahz ve kabz eylediğimden sonra sâlifü’l-beyân tarlaları mahallinde zabt ve tasarrufa mezbûr Selim Beşe’yi taslît eyledim min ba‘d zikr olunan tarlalarda alâka ve medhalim kalmadı mezbûr Selim Beşe emsâli tasarrufu gibi mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ min şehri Recebi’l-ferd li sene tis‘în ve elf. Şuhûdü’l-hâl: Osman b. Derviş, Mehmed b. Ali, Süleyman b. Mehmed, Osman b. Mustafa, Hüseyin Çelebi b. Ali, Hasan b. Abdullah, Ali b. Abdullah.