Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 70 Hüküm no: 10 Orijinal metin no: [3a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Halife b. Hızır’ın vârisinin Mustafa b. Mehmed olduğu Fi’l-asl vilâyet-i Anadolu’da Fenaris kazâsına tâbi‘ Aydınlı nâm karye ahâlîsinden olup Havâss-ı Aliyye kazâsı Terkos nâhiyesine tâbi‘ Balaban Burnu demekle ma‘rûf mahalde vâki‘ beylik mandırada imâm iken târih-i kitâbdan o[n] yedi ay mukaddem vefât eden Şaban Halîfe b. Hızır nâm müteveffânın [li ebeveyn] er karındaşının sulbî oğlu ve hasren vârisi olduğunu iddi‘â eden bâ‘is-i hâze’l-kitâb Mustafa b. Mehmed nâm kimesne tarafından tereke-i muhallefât-ı müteveffâ-yı mezbûra vâzı‘ü’l-yed olanlardan da‘vâ ve taleb iktizâ ederse sulh ve ibrâya ve bedel-i sulhu ahz ve kabz ve kendiye îsâle vekîl olup hasm-ı câhid-i şer‘î mahzarında kazâ-i mezbûre tâbi‘ Koruklu nâm karyeden Hüseyin Bey b. Mehmed ve Mustafa Beşe b. Ahmed nâm kimesneler şehâdetleri ile şer‘an vekâleti sâbite olan Yahya Çelebi b. Ahmed nâm vekîl meclis-i şer‘-i hatîr-i lâzımü’t-tevkīrde târih-i mezbûrede nâhiye-i mezbûrede vâki‘ olan beytülmâli ahz ve kabza memûr olmağla müteveffâ-yı mezbûrun zâhirde vâris-i ma‘rûfu olmamak zu‘muyla tereke-i müteveffâ-yı mezbûre vâzı‘ü’l-yed olan kıdvetü’l-emâsil ve’l-akrân Ahmed Ağa b. Abdünnebi mahzarında bi’l-vekâle üzerine da‘vâ ve takrîr-i kelâm edip mezbûr Ahmed Ağa müteveffâ-yı mezbûr Şaban Halîfe’nin zâhirde vâris-i ma‘rûfu olmamağla terekesi cânib-i beytülmâle âid olmak zu‘mu ile tereke-i müteveffâ-yı mezbûru ahz ve kabz etmişdir suâl olunup vekâletim hasebiyle bana teslîme tenbîh olunmak matlûbumdur dedikde gıbbe’s-suâl mezbûr Ahmed Ağa cevâbında tereke-i müteveffâ-yı mezbûrun ahz ve kabzını ikrâr lâkin müvekkil-i mezbûr Mustafa müteveffâ-yı mezbûr Şaban Halîfe’nin li ebeveyn er karındaşı oğlu olup ve hasren vârisi olduğunu inkâr edicek vekîl-i mezbûrda da‘vâsına mutâbıka beyyine taleb olundukda udûl-i ahrâr-ı ricâl-i müslimînden olan şâhidân-ı [3b] mezbûrân Hüseyin Bey ve Mustafa Beşe meclis-i şer‘a li ecli’ş-şehâde hâzırân olup isre’l-istişhâd fi’l-hakīka müvekkil-i mezbûr Mustafa müteveffâ-yı mezbûr Şaban Halîfe’nin li ebeveyn er karındaşı mezbûr Mehmed’in sulbî oğludur zirâ‘ müteveffâ-yı mezbûr Şaban Halîfe’nin babası Hızır ile müvekkil-i mezbûr Mustafa’nın babası merkūm Mehmed li ebeveyn er karındaşlar olup babaları ismi Çakal Şaban ve dedeleri ismi Abdullah ve anaları ismi Fâtıma nâm hâtundur ve maskat-ı re’sleri karye-i mezbûre Aydınlı’dır müvekkil-i mezbûr Mustafa müteveffâ-yı mezbûrun hasren vârisi ve terekesine müstahıkdır mezbûr Mustafa için tereke-i müteveffâ-yı mezbûre vaz‘-ı yed edenlerden hakk-ı taleb ve ahz vardır mezbûr Mustafa’dan gayri tereke-i müteveffâ-yı mezbûre müstahıkk-ı âhar olduğunu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle müvekkil-i mezbûrun verâsetine hüküm ve mezbûr Ahmed Ağa’ya makbûzu olan tereke-i müteveffâ-yı mezkûru vekîl-i mezbûre teslîme tenbîhden sonra vekîl-i mezbûr meclis-i âhirde mezbûr Ahmed Ağa mahzarında bi’l-vekâle ikrâr ve takrîr-i kelâm edip müteveffâ-yı mezbûr Şaban Halîfe’nin terekesinden mezbûr Ahmed Ağa’nın makbûzu olan iki bin yedi yüz akçeyi bi’t-tamâm vekâletim hasebiyle mezbûr Ahmed Ağa yedinden ahz ve kabz edip ba‘de’l-yevm müteveffâ-yı mezbûrun muhallefâtına müte‘allika da‘vâdan mezbûr Ahmed Ağa’nın bi’l-vekâle zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min şehri Recebi’l-mürecceb li sene tis‘în ve elf. Şuhûdü’l-hâl: Mustafa Çavuş b. Mahmud Mübâşir, Ahmed Çelebi b. Süleyman, Abdülkādir Çelebi b. İbrahim, Mehmed b. Mahmud, Hüseyin b. Ali ve gayruhüm.