Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 72 Hüküm no: 11 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıkçı Yusuf’un saraya ulaştırmak üzere hamal Davud’a perde teslim ettiği Hâssa bostancı hasekilerinden fahrü’l-akrân Ali Haseki b. İbrahim Saray-ı hâssa hamallarından Davud b. Derviş nâm hamal meclis-i şer‘a ihzâr eyledikde Kayıkçı tâifesinden bâ‘is-i hâze’l-vesîka Yusuf b. Abdullah nâm kimesne mezbûr Davud mahzarında üzerine da‘vâ ve takrîr-i kelâm edip târih-i kitâbdan beş gün mukaddem Cum‘a günü salât-i Cum‘a kılındıkdan sonra Saray-ı hâssa perdelerinden yüzü dârâyî ve asdarı kırmızı bogasi kaplı tahmînen iki akçe kıymetli iki kebîr perdeyi Saray-ı hümâyûna götürüp kabzına memûr olanlara teslîm eyle deyû mezbûr Davud’a teslîm mezbûr Davud dahi ahz ve kabz eyledikden sonra mezbûr Davud mezkûr perdeleri mahalline îsâl etmeyip ketm ve ihfâ etmekle hâlâ mezkûr perdeleri kabzına memûr olanlar benden taleb ederler suâl olunup alıverilmesi matlûbumdur dedikde gıbbe’s-suâl ve akībe’l-inkâr ve isre talebi’l-beyyine udûl-i ricâl-i ahrâr-ı müslimînden olup mezkûr iskelelerde hamallık eden hamallardan İstavroz’da sâkin Mehmed b. Abdullah ve Ahmed b. Mehmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ zikr olunan iki aded perdeleri târih-i kitâbdan beş gün mukaddem Cum‘a günü salât-i Cum‘a kılındıkdan sonra mezkûr Yusuf merkūm Davud’a teslîm ettiğinden sonra mezkûr perdeleri biz merkūm Davud’un yedinde gördük biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm mâ hüve’l-vâki‘ ketb olundu. Fi’l-yevmi’t-tâsi‘ min Recebi’l-mürecceb li sene tis‘în ve elf. Şuhûdü’l-hâl: Mustafa b. Abbas, Hüseyin b. Mehmed, Musli b. Veli, Hasan b. Eyüb, Mehmed b. Eyüb ve gayruhüm.