Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 75 Hüküm no: 13 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eskeline bt. Yani’nin eşyalarını eşi Yani v. Duka’ya vasiyet etmesi Mahmiye-i İstanbul hısnı ebvâbından Topkapısı hâricinde vâki‘ Nakkāş Paşa bostanında sâkine Eskeline bt. Yani nâm nasrâniyye tarafından ikrâr-ı âti’l-beyâna vekîl olup vekâleti Hasan Efendi b. Muharrem ve Hüseyin [b.] Şaban nâm kimesneler şehâdetleriyle hasm-ı câhid mahzarında şer‘an sâbite olan Sâliha bt. Yunus nâm hâtun meclis-i şer‘-i şerîfde müvekkile-i mezbûre zevci râfi‘-i hâze’r-rakīm Yani v. Duka nâm zimmî muvâcehesinde bi’l-vekâle ikrâr ve takrîr-i kelâm edip müvekkilem mezbûre Eskeline’nin silk-i mülk-i sahîhinde münselik eşyâsından bir sîm ön kuşak ve kırk dirhem iki çift sîm bilezik ve dört yemeni yastık ve iki döşek ve bir fistan ve bir sandal kaftan ve bir kenarları cedîd beş gömlek ve bir beyaz bogasi entari ve bir sandal çintiyân ve sandal kaplı mintan beyaz tavşan kürkü ve iki tencere ve bir sahan ve bir mor zenne ferâcesi ve sâir kalîl ü kesîr ve celîl ü hakīr bi’l-cümle ism-i mâl ıtlâk olunur eşyâsını ba‘de helâkihâ zevci mesfûr Yani semeni misli ile âhara bey‘ ve semeninden kadr-i kifâye techîz ve tekfîni görüp fazlası zevcim mesfûr Yani’nin mülkü olsun deyû vasiyyet eyledikde mesfûr Yani dahi vesâyet-i mezbûreyi kabûl ve hıdemât-ı lâzımesin edâya ta‘ahhüd etmişdir dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire li sene tis‘în ve elf. Şuhûdü’l-hâl: Mehmed b. Hasan, İbrahim b. Cafer, Hasan b. Ali, Mehmed b. Eyüb, Mehmed b. Mahmud, Hasan b. Abdullah, ve gayruhüm mine’l-huzzâr.