Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 76 Hüküm no: 15 Orijinal metin no: [4b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hasan’ın vakıf evi Kadı Ahmed Efendi’ye devretmesi Anadolu kuzâtından olup sâbıkan Merzifon kadısı olan fahrü’l-kuzât Ahmed Efendi b. el-Hâc Yusuf meclis-i şer‘-i şerîfde işbu râfi‘atü’l-vesîka-i hâliyesi olan Fâtıma bt. Hasan nâm hâtun mahzarında tâyi‘an ikrâr-ı tâm ve takrîr-i kelâm edip mezbûre Fâtıma Hâtun taht-ı tasarrufunda olup medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından İslâm Bey mahallesinde vâki‘ mezbûr İslâm Bey vakfı’ndan olup lede’l-ahâlî ve’l-cîrân ma‘lûmü’l-hudûd vakf menzilimin kaydı defter-i vakıfda mezbûre Fâtıma üzerinde olup lâkin menzil-i mezbûru icâre-i mu‘accelesi olan beş bin akçeyi taraf-ı vakfa bundan akdem vefât eden vâlidem ( ) müteveffât hâl-i hayâtında kendi malından edâ edip ba‘de vefâtihâ ben müteveffât-ı mezbûrenin hasren vârisi olmağla menzil-i mezkûr intikāl-i âdî ile bana intikāl etmişdir deyû taleb ve da‘vâ etmişidim el-hâletü hâzihî beynimizde muslihûn-ı müslimûn tavassut edip beni kendi malımdan yirmi dokuz guruş mezbûr Fâtıma’ya bedel-i ferâğ vermek üzre sulh eylelediklerinde ben dahi sulh-ı mezbûru ba‘de’l-kabûl mezbûre Fâtıma’ya bedel-i ferâğ kendi malımdan yirmi dokuz esedî guruş edâ ve teslîm ol dahi menzil-i mezkûru vakf-ı mezbûr mütevellîsi ma‘rifetiyle bana ferâğ ve tefvîz eyledi. Min ba‘d bedel-i mezkûr yirmi dokuz esedî guruşa ve bundan akdem mezbûre Fâtıma’dan cihet-i karz-ı şer‘den taleb ve da‘vâ eylediğim elli beş esedî guruş dahi ki cem‘an seksen dört guruşa müte‘allika âmme-i de‘âvîden ve mütâlebâtdan mezbûre Fâtıma’nın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ cerâ gıbbe’t-taleb ketb olundu. Fi’l-yevmi’l-hâmis aşer min Cumâdelâhire li sene tis‘în ve elf. Şuhûdü’l-hâl: Veli Efendi b. Ahmed, Halil Efendi b. İbrahim, Çukadâr Ahmed Beşe b. Hasan, Hüseyin Çelebi b. Ali ve gayruhüm.