Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 77 Hüküm no: 16 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Usta b. Ramazan’ın cariyesi Muammer bt. Abdullah’ı azat etmesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Çavuş Kasım mahallesi sükkânından Hüseyin Usta b. Ramazan tarafından ıtk-ı âti’l-beyânı ikrâra vekîl olup Ali Efendi b. Mehmed ve Mehmed Bey b. Ömer nâm kimesneler şehâdetleri ile şer‘an vekâleti sâbite olan Mustafa Çelebi b. Mehmed nâm kimesne meclis-i şer‘-i şerîf-i enverde bi’l-vekâle ikrâr-ı tâm ve takrîr-i kelâm edip müvekkilim mezbûr Hüseyin Usta kendiye rıkkını mu‘terife uzun boylu, açık kaşlı, elâ gözlü, ensesinde eser-i cerhi olan Rûsiyyetü’l-asl bâ‘isetü’l-kitâb Muammer bt. Abdullah nâm câriye-i memlûkesini cemî‘ malından ifrâz ve hasbeten lillâhi’l-hallâk i‘tâk ve tahrîr edip zümre-i harâir-i asliyyâta ilhâk ve idrâc eyleyip min ba‘d mevsûfe-i merkūme Muammer sâir harâir-i asliyyât gibi hürre olup üzerinde hakk-ı velâdan gayrı hakkım kalmadı dedikde mâ cerâ alâ akdi’l-minvâl gıbbe’l-ibtigā ketb olundu. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: Ahmed Çelebi b. Yusuf, Mehmed Beşe b. Mustafa, Ahmed Bey b. Abdülbâkī, Mustafa Çelebi b. Cafer, Oruc Bey b. ( )