Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 78 Hüküm no: 17 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Usta b. Ramazan’ın evini Mehmed Ağa b. Ömer’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Çavuş Kasım mahallesi sükkânından fahrü’l-eşbâh Hüseyin Usta b. Ramazan tarafından bey‘-i âti’z-zikri ikrâra vekîl olup hasm-ı câhid mahzarında Ali Efendi b. Mehmed ve Ahmed Çelebi b. Yusuf nâm kimesneler şehâdetleriyle şer‘an vekâleti sâbite olan Mustafa Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed Ağa b. Ömer mahzarında bi’l-vekâle ikrâr-ı tâm ve takrîr-i kelâm edip müvekkilim mezbûr Hüseyin Usta akd-i câ’i’z-zikrin sudûruna değin silk-i mülk-i sahîhinde münselik olup mahalle-i mezbûrede vâki‘ bir tarafdan çinici Ahmed Ağa mülkü ve bir tarafdan sulehâya meşrûta menzil ve iki tarafdan tarîk-i âm ile mahdûd hâriciyyesinde bir fevkānî oda ve bir sofa ve bi’r-i mâ ve üç kepenk bakkal dükkânını ve dâhiliyyesinde iki fevkānî oda ve altında matbah ve bir sobalı oda ve bi’r-i mâ ve bahçeyi müştemil menzilini cemî‘ tevâbi‘ ve levâhıkıyla mezbûr Mehmed Ağa’ya bin kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mastûr bin guruşu mezbûr Mehmed Ağa yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezbûrda vechen mine’l-vücûh alâka ve medhalim kalmadı mezbûr Mehmed Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedi dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: Ahmed Bey b. Abd[ülbâkī], es-sâbıkūn.