Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 78 Hüküm no: 18 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitraki v. Yani’nin kışlağını Ali Çelebi b. Abdullah’ın daha önceki sahibinden satın aldığı iddiasının geçerli olmadığı Mahmiye-i İstanbul’da Derviş Ali mahallesi sükkânından Ali Çelebi b. Abdullah nâm kimesne mahfil-i kazâda zikr-i âtî kışlak içinde mevzû‘ hayvanât ve sâir emlâke vâzı‘ü’l-yed olan işbu râfi‘ü’t-terkīm Dimitraki v. Yanaki nâm zimmî muvâcehesinde üzerine da‘vâ ve takrîr-i kelâm edip mahmiye-i mezkûrede hısnı ebvâbından Ayakapısı hâricinde sâkin sâbıkan Meydan kasablarından iken gaybet-i münkatı‘a ile gāib olan Todori v. Papa Dimitri mukaddemâ kendi taht-ı tasarrufunda olup Havâss-ı Aliyye kazâsına tâbi‘ Silivri nâhiyesi müzâfâtından Çukur Çengel nâm karye sınırı dâhilinde vâki‘ kışlak içinde mevzû‘ olan emlâkinden bir çift su sığırı öküzü ve beş re’s bârgir ve iki saz dam ve iki ağıl ve iki kıt‘a bağ ve beş bakraç ve iki leğen ma‘a ibrik ve iki tencere ve bir tas ve dör[t] tırpan ve iki bukağı ve iki keser ve iki balta ve avcı burgu ve bir kantar ve iki destere ve iki mikrâs ve dört çuval ve iki bezir-i kandil ve iki ağaç çanak ve bir saç ayağı ve bir akçe tahtası ve bir çapa ve iki fıçı ve iki tekne ve bir hasır ve bir semer ve bir çul ve bir saban demiri ve bir fırını ve on dört arı kovanı ve yirmi dört kaz ve otuz beş tavuğun nısf-ı şâyi‘ini târih-i kitâbdan bir sene mukaddem on bin akçe mukābelesinde bana bey‘ ve teslîm ben dahi iştirâ ve tesellüm eylediğimden sonra semen-i mezbûr on bin akçeyi mesfûr Todori zimmetinde mütekarrir yirmi bir bin akçe hakkımdan on bin akçesine takās edip ben dahi mukāssa ve kabz ve kabûl etmişiken, hâlâ merkūm Dimitraki emlâk-i muharrer-i mezkûrenin cümlesini mesfûr Todori’den târih-i kitâbdan beş sene mukaddem iştirâ ve kabz eyledim deyû bi gayri hakkın vaz‘-ı yed eder suâl olunup mersûm Dimitraki’nin emlâk-i merkūmenin nısf-ı şâyi‘inden kasr-ı yedine tenbîh olunmak matlûbumdur dedikde gıbbe’s-suâl mesfûr Dimitraki cevâbında târih-i kitâbdan beş sene mukaddem emlâk-i muharrere-i mezkûreyi merkūm Todori bana yirmi beş bin akçe mukābelesinde bey‘ ve teslîm ve kabz-ı semen etmeğin emlâk-i mezbûre benim mülk-i müşterâm olmak hasebiyle vaz‘-ı yed ederim deyû def‘le mukābele edicek isre’l-istintâk ve akībe’l-inkâr ve gıbbe talebi’l-beyyine udûl-i ahrâr-ı ricâlden olup mahmiye-i mezbûrede Beyceğiz mahallesi sâkinlerinden Hüseyin b. Abdullah ve Draman Çeşmesi kurbunda sâkin Ali b. Ömer nâm kimesneler makām-ı kazâya li ecli’ş-şehâde hâzırân olup istişhâd olunduklarında fi’l-hakīka gāib-i merkūm Todori emlâk-i muharrere-i mezkûresini meblağ-ı mastûr yirmi beş bin akçeye merkūm Dimitraki’ye bizim huzûrumuzda bey‘ ve tesellüm-i mebî‘ ve kabz-ı semen eyledim deyû tâyi‘an ikrâr ve bizi işhâd eyledi. [5b] Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle zikr olunan emlâke müte‘allika merkūm Dimitraki yedini vech-i ta‘arruzdan mezbûr Ali Çelebi’yi men‘ birle mâ hüve’l-vâki‘ alâ hâze’l-minvâl gıbbe’l-ibtigā ketb olundu. Fi’l-yevmi’r-râbi‘ ve’l-ışrîn min Cumâdelâhire li sene tis‘în ve elf. Şuhûdü’l-hâl: İbrahim Çelebi b. Abdullah, es-Seyyid Ârif Çelebi b. Mustafa, Ahmed b. Hasan Çukadâr, Hasan b. Abdullah, Mehmed b. Eyüb.