Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 79 Hüküm no: 19 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vildan bt. Abdullah’ın evini Âtike bt. Mehmed’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘ü’l-Kebîr mahallesi sâkinlerinden Vildan bt. Abdullah nâm hâtun meclis-i şer‘-i şerîfde işbu bâ‘isetü’l-vesîka Âtike bt. Mehmed nâm hâtun muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Süleyman Efendi tasarrufunda olan vakf menzil ve bir tarafı Balcı oğlu Receb mülkü ve bir tarafı tarîk-i hâs ve bir tarafı tarîk-i âm ile mahdûd bir bâb fevkānî oda ve bir sofa ve iki bâb tahtânî oda ve bir matbah ve bi’r-i mâ ve menzil-i mezbûr altında iki bâb attâr dükkânı ve üç kepenk bir bâb bakkal dükkânını müştemil mülk menzilimi cemî‘ tevâbi‘ ve levâhıkı ile mezbûre Âtike Hâtun’a otuz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr otuz bin akçeyi mezbûre Âtike Hâtun yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur mezbûre Âtike Hâtun’un müşterâsı olmuşdur keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ gıbbe’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: Ahmed Çelebi, Müfettişzâde Mustafa Çelebi, Mustafa Çelebi b. Ahmed, Mehmed Efendi b. Süleyman, Mustafa b. Ahmed, Abdullah b. Abdullah, Hüseyin b. Ali.