Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 80 Hüküm no: 20 Orijinal metin no: [5b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan ve Hüseyin b. Mustafa’nın mükâteb köleleri Yuvan v. Mosko’yu azat etmeleri Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı Paşa mahallesi sâkinlerinden Hüseyin ve Hasan ibney Mustafa nâm kimesneler meclis-i şer‘-i şerîfde kendilere rıkkını mu‘terife orta boylu, açık kaşlı, sarı sakallı, gök elâ gözlü, ensesinde eser-i cerhi olan Rûsiyyü’l-asl İseviyyü’l-mille râfi‘-i hâze’r-rakīm Yuvan v. Mosko nâm abd-i memlûkleri muvâcehesinde her biri ikrâr-ı tâm ve takrîr-i kelâm edip mevsûf-ı merkūm Yuvan abd-i memlûkümüz olmağla târih-i kitâbdan üç sene tamâmına değin ikimize ma‘an hizmet edip sinîn-i mezkûre tamâmında cemî‘ malımızdan âzâd olmak üzre mersûm Yuvan’ı hizmet-i kitâbete kat‘ eyledik ba‘de’l-yevm mevsûf-ı mesfûr Yuvan bilâ-ibâk ve lâ-hıyâne sinîn-i mersûme tamâmına değin bize hizmet ettikde sâir ahrâr-ı asliyyîn zümresine ilhâk ve idrâc olup üzerinde hakk-ı velâdan gayrı hakkımız kalmadı dediklerinde gıbbe’t-tasdîk ve’l-kabûl mâ cerâ bi’l-ibtigā ketb olundu. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: Fahrü’l-akrân Hasan Ağa b. Abdülmennân, Fahrü’l-kuzât Abdülkādir Efendi, Receb Efendi b. Yusuf el-İmâm, el-Hâc Mustafa Ağa, Mustafa Çavuş b. Receb, Hızır Bey b. Ramazan, Şahbaz Bey b. Abdullah, Ali Çelebi b. Hamza, Kaytas b. Abdullah Mehmed Beşe b. Ali ve gayruhüm mine’l-huzzâr.