Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 81 Hüküm no: 21 Orijinal metin no: [5b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Kosta’nın evini Yorgi v. Şimo’ya satması Vilâyet-i Rumeli’nde Çatalca kazâsında Nuhur Kostrova nâm karye âhâlîleri Dimo v. Kosta nâm zimmî meclis-i şer‘-i şerîfde Yorgi v. Şiro nâm zimmî tarafından ikrâr-ı âti’l-beyânı tasdîke vekîl olup Yorgi v. Yani ve Minho v. Yani nâm zimmîler şehâdetleriyle şer‘an vekâleti sâbite olan Yorgi v. Kosta nâm zimmî muvâcehesinde ikrâr ve i‘tirâf edip silk-i mülk-i sahîhimde münselik emlâkimden olup karye-i mezbûrede vâki‘ bir tarafı Kosta nâm zimmî mülkü ve bir tarafı Hristo nâm zimmî mülkü ve iki tarafı tarîk-i âm ile mahdûd iki bâb tahtânî oda ve bir bostan yeri ve zât eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkıyla müvekkil-i mezbûr Yorgi’ye altmış kıt‘a esedî guruşa bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûr altmış esedî guruşu müvekkil-i mersûm Yorgi yedinden ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur müvekkil-i mezbûrun mülk-i müşterâsı olmuşdur keyfe mâ yeşâ’ mahallinde zabt ve tasarrufa mezbûr Yorgi’yi tarafımdan taslît eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sânî ve’l-ışrîn min Cumâdelâhire li sene tis‘în ve elf. Şuhûdü’l-hâl: Mehmed Efendi b. Nasuh, Mehmed b. Mahmud, Mehmed b. Eyüb, Hüseyin b. Ali, Ali b. Abdullah, Hasan b. Abdullah.