Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 82 Hüküm no: 23 Orijinal metin no: [6a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani bt. Mehmed’in cariyesi Gülistan’ı azat etmesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Nişancı Paşa mahallesi sâkinelerinden Ümmühâni bt. Mehmed nâm hâtunun sadrî kebîr oğlu ve tarafeynden akd-i âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan Ali Çelebi b. Hamza ve Hasan b. Mustafa nâm kimesneler şehâdetleriyle şer‘an vekâleti sâbite olan Hüseyin b. Mustafa nâm kimesne meclis-i şer‘-i hatîr-i lâzumü’t-tevkīrde bi’l-vekâle ikrâr-ı tâm ve takrîr-i kelâm edip müvekkilem vâlidem mezbûre Ümmühâni Hâtun kendiye rıkkını mu‘terife orta boylu, açık kaşlı, elâ gözlü Rûsiyyetü’l-asl bâ‘isetü’l-kitâb Gülistan bt. Abdullah nâm câriye-i memlûkesini cemî‘ malından ikrâr ve hasbeten lillâhi’l-ganiyyi’l-hallâk i‘tâk ve tahrîr ve zümre-i harâir-i asliyyâta ilhâk ve idrâc edip min ba‘d mevsûfe-i merkūme Gülistan sâir harâir-i asliyyât gibi hürre olup üzerinde hakk-ı velâdan gayrı hakkım bâkī kalmadı dedikde mâ hüve’l-vâki‘ alâ hâze’l-minvâl gıbbe’l-ibtigā ketb olundu. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: Fahrü’l-akrân Hasan Ağa b. Abdülmennân, Receb Efendi b. Yusuf el-İmâm, el-Hâc Mustafa Ağa b. ( ), Hızır Bey b. Ramazan, Mustafa Çavuş b. Receb, Şahbaz Bey b. Abdullah, Kaytas b. Abdullah, Mehmed Beşe b. Veli.