Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 82 Hüküm no: 25 Orijinal metin no: [6a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın evini Evlice Baba Mescidi para vakfına istiğlâl yoluylasatması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Câmi‘-i Kebîr mahallesi sâkinelerinden Âişe bt. Mustafa nâm hâtun tarafından husûs-ı âti’l-beyânı ikrâra vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Mustafa b. Mehmed ve diğer Mustafa b. Receb şehâdetleri ile şer‘an vekâleti sâbite olan Ali Çelebi b. Derviş nâm kimesne meclis-i şer‘-i hatîr-i lâzımü’t-tevkīrde medîne-i mezbûrede vâki‘ merhûm Evlice Baba mescidine mevkūfe nukūdun bi’l-fi‘l mütevellîsi olan işbu râfi‘ü’l-kitâb Osman Çelebi b. Mehmed Usta nâm kimesne mahzarında bi’l-vekâle ikrâr-ı tâm ve takrîr-i kelâm edip müvekkilem merkūme Âişe Hâtun silk-i mülkünde ve zabt ve tasarrufunda olup mahalle-i mezbûrede vâki‘ bir tarafdan Nakkāş Sâlih Çelebi mülkü ve bir tarafdan vakf bostan ve bir tarafdan dere ve bir tarafdan tarîk-i âm ile mahdûd mülk menzilini cemî‘ tevâbi‘ ve levâhıkıyla mütevellî-i mezbûr Osman Çelebi’ye elli kıt‘a esedî guruşa bi tarîki’l-istiğlâl bey‘ ve teslîm ol dahi mâl-ı vakf-ı mezbûr ile tarîk-i mezkûr üzerinde iştirâ ve tesellüm ve kabûl eyleyip semeni olan meblağ-ı mastûr elli guruşu mütevellî-i mezbûr yedinden tamâmen ahz ve kabz eylediğimden sonra yine mütevellî-i mezbûr menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan her sene yedi buçuk esedî guruş ücret ile müvekkilem merkūme Âişe’ye üç sene tamâmına değin îcâr ve teslîm ol dahi ber vech-i muharrer istîcâr ve tesellüm ve kabûl eyledim dedi dedikde gıbbe’t-tasdîki’ş-şer‘î mâ vaka‘a bi’l-ibtigā kayd şüd. Fi’l-yevmi’s-sâbi‘ ve’l-ışrîn min Cumâdelâhire sene [10]90. Şuhûdü’l-hâl: Mehmed Efendi b. Ahmed el-İmâm, Ahmed Çelebi b. Abdullah, Abdullah Halîfe b. Abdullah, Abdi Beşe b. Mehmed, Nasuh b. Ebûbekir ve gayruhüm.