Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 83 Hüküm no: 26 Orijinal metin no: [6a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Göka v. Nikola’nın İncirli köyündeki taşlığını satması Fi’l-asl vilâyet-i Rumeli’nde livâ-i Avlonya’da Ergirikasrı kazâsına tâbi‘ Tranoşişte nâm karyeden olup hâlâ Havâss-ı Aliyye kazâsına tâbi‘ İncirli nâm karye sınırı dâhilinde Domuzdamı nâm mevzi‘de bakkal olan Papa Göka v. Nikola nâm zimmî meclis-i şer‘-i şerîfde işbu râfi‘ü’r-rakīm Nano v. Petko ve Dimo v. Petyo nâm zimmîler muvâcehelerinde tâyi‘an ikrâr ve takrîr-i kelâm edip akd-i âtî sudûruna değin silk-i mülk ve zabt ve tasarrufumda olup mevzi‘-i mezkûrda vâki‘ bir tarafdan Kazimitro nâm zimmî taşlığı ve bir tarafdan arsa-i hâliye ve iki tarafdan [tarîk-i] âm ile mahdûd mülk taşlığımı cemî‘ hukūk ve merâfıkı ile mezbûrân Nano ve Dimo’ya ale’l-iştirâki’s-seviy mutasarrıf olmak üzre yüz yirmi kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi ber vech-i muharrer iştirâ ve tesellüm ve kabûl eylediklerinden sonra semeni olan meblağ-ı mezkûr yüz yirmi guruşu merkūmân Nano ve Dimo yedlerinden bi’t-tamâm ve’l-kemâl ahz ve kabz eyledim min ba‘d zikr olunan taşlıkda vechen mine’l-vücûh alâka ve medhalim kalmadı merkūmân Nano ve Dimo’nun mülk-i müşterâlarıdır keyfe mâ yeşâ’ân mutasarrıfân olsunlar dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’l-hâmis ve’l-ışrîn li sene tis‘în ve elf. Şuhûdü’l-hâl: Hüseyin b. Ali, Mehmed b. Eyüb, Hasan b. Abdullah, Mehmed b. Mahmud ve gayruhüm.