Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 84 Hüküm no: 27 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üveys b. Mehmed’in Hristo v. Yani zimmetinde kalan parasını vârislerin alması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesi sükkânından iken bundan akdem fevt olan Üveys b. Mehmed’in sulbî sagīr oğlu Mehmed’in vâlidesi ve tesviye-i umûruna kıbeli’ş-şer‘ mansûbe vasîsi olan Sâliha bt. Maksud nâm hâtun meclis-i şer‘-i şerîfde medîne-i mezbûre sûkunda bakkal olan işbu râfi‘ü’r-rakīm Hristo v. Yani nâm zimmî muvâcehesinde bi’l-vesâye ikrâr ve takrîr-i kelâm edip müteveffâ-yı mezbûr hayâtında merkūm Hristo’ya sermâye nâmına on iki bin nakid akçe ikrâz ve teslîm ol dahi istikrâz [ve] ahz ve kabz ettiğinden sonra bin üç yüz akçe dahi pîşegirlik ücretinden mesfûr Hristo zimmetinde müctemi‘a oldukdan sonra müteveffâ-yı mezbûr yine hayâtında meblağ-ı merkūmdan bin iki yüz akçesini ahz ve kabz edip mesfûr Hristo zimmetinde on iki bin üç yüz akçe bâkī kalmışidi hâlâ meblağ-ı bâkī on iki bin üç yüz akçeyi dahi vesâyet-i mahkiyem hasebiyle mesfûr Hristo yedinden bi’t-tamâm ve’l-kemâl ahz ve kabz eyledim min ba‘d meblağ-ı mezkûr on üç bin beş yüz akçeden mersûm Hristo zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâdis ve’l-ışrîn min Cumâdelâhire li sene tis‘în ve elf. Şuhûdü’l-hâl: Mehmed Beşe b. Abdullah Bazarbaşı, Ahmed Beşe b. Hüseyin Çukadâr, Mehmed b. Yusuf, Hasan b. Abdullah ve gayruhüm.