Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 84 Hüküm no: 28 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasomi v. Obtertoz’a Mahmud Ağa b. Sefer’e olan borcunu ödemesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kiremitçi Süleyman Çelebi mahallesinde sâkin fahrü’l-emâsil ve’l-akrân Mahmud Ağa b. Sefer tarafından meblağ-ı âti’l-beyânı da‘vâ ve taleb ve ahz ve kabz ve kendiye îsâle vekîl olup Ahmed b. Abdullah ve Mehmed b. Ahmed nâm kimesneler şehâdetleri ile hasm-ı câhid mahzarında şer‘an vekâleti sâbite olan Ali Çavuş b. Mehmed Usta meclis-i şer‘-i şerîfde sefîne reislerinden Yasomi v. Obtertoz nâm zimmî muvâcehesinde bi’l-vekâle üzerine da‘vâ ve takrîr-i kelâm edip müvekkil-i mûmâ-ileyh Mahmud Ağa’nın merkūm Yasomi zimmetinde cihet-i deyn-i şer‘îden yüz esedî guruş hakkı olup bundan akdem meblağ-ı mezbûrun kırk guruşunu müvekkilim mûmâ-ileyh Mahmud Ağa mersûm Yasomi yedinden ahz edip zimmetinde altmış esedî guruş bâkī kalmışidi hâlâ meblağ-ı bâkī altmış guruşu vekâletim hasebiyle merkūm Yasomi’den taleb ederim suâl olunup alıverilmesi murâdımdır dedikde gıbbe’s-suâl mezbûr Yasomi cevâbında fi’l-vâki‘ müvekkil-i mûmâ-ileyh Mahmud Ağa’ya cihet-i merkūmeden yüz esedî guruş deynim olup lâkin bundan akdem meblağ-ı mezbûrun kırk guruşunu mûmâ-ileyhe edâ ve teslîm edip zimmetimde müvekkil-i mûmâ-ileyh Mahmud Ağa’ya lâzımü’l-edâ altmış guruş deynim bâkī kalmışdır deyû ikrâr ve i‘tirâf etmeğin alâ mûcibi i‘tirâfihî meblağ-ı bâkī altmış esedî guruşu vekîl-i mezbûra edâ ve teslîme mezbûr Yasomi’ye tenbîh birle mâ vaka‘a kayd şüd. Fî 27 Cumâdelâhire sene [10]90. Şuhûdü’l-hâl: Hasan [b.] Ali, Hüseyin [b.] Ali, Hamdi [b.] Eyüb, Mehmed [b.] Mahmud ve gayruhüm.