Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 86 Hüküm no: 30 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saime bt. Ahmed’in evini İbrahim Çelebi b. Ahmed’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Çavuş Kasım mahallesi sükkânından Saime bt. Ahmed nâm hâtun meclis-i şer‘-i şerîfde işbu râfi‘ü’l-kitâb İbrahim Çelebi b. Ahmed mahzarında tâyi‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafı Saraylı Râbia Hâtun mülkü ve bir tarafı diğer Saraylı Züleyha Hâtun bt. Abdullah mülkü ve bir tarafı Âişe bt. Ebâ Bekir bahçesi ve bir tarafı tarîk-i âm ile mahdûd bir fevkānî ve bir tahtânî oda ve bir tahta dehliz ve mezbûre Âişe ile müşterek bi’r-i mâyı ve bir mikdâr bahçeyi ve mezbûre Züleyha tarafında vâki‘ arzen iki ve tûlen menzil-i mezkûrun tûlü mikdârı damlalık ta‘bîr olunur arsa-i hâliyemi ve bir kenîfi müştemil mülk menzilimi cemî‘ tevâbi‘ ve levâhıkıyla mezbûr İbrahim Çelebi’ye yüz yirmi kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile ile [bey‘] ve teslîm ol dahi ber vech-i muharrer iştirâ ve tesellüm ve kabûl eylediklerinden sonra semeni olan meblağ-ı mezkûr yüz yirmi esedî guruşu mezbûr İbrahim Çelebi yedinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur mezbûr İbrahim Çelebi’nin mülk-i müşterâsıdır keyfe mâ yeşâ’ ve haysü mâ yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’s-sâmin ve’l-ışrîn min Cumâdelâhire li sene tis‘în ve elf. Şuhûdü’l-hâl: Ali Bey b. Mehmed, Bayram b. Mustafa, Berber Mustafa Çelebi b. Abdülkerim, Nalband Hamza b. Hüseyin, Ârif Çelebi b. Mustafa, Mahmud Beşe b. Abdullah.