Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 87 Hüküm no: 31 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üveys b. Mehmed’in küçük çocuğu Mehmed’e kendi malından nafaka takdir edilmesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesi sükkânından iken bundan akdem fevt olan Üveys b. Mehmed’in verâseti zevce-i metrûkesi Meryem bt. Mehmed nâm hâtun ile sulbî sagīr oğlu Mehmed’e münhasıra olduğu şer[‘an] zâhir ve mütehakkik oldukdan sonra sagīr-i mezbûrun vâlidesi ve hâlâ hidâne ve tesviye-i umûruna min kıbeli’ş-şer‘ mansûbe vasîsi olan işbu râfi‘atü’l-kitâb Sâliha bt. Maksud nâm hâtun meclis-i şer‘-i şerîf-i enverde bi hakki’l-hidâne takrîr-i kelâm ve ta‘bîr ani’l-merâm edip sagīr-i mezbûreye babası müteveffâ-yı mezbûrdan bi’l-irsi’ş-şer‘î intikāl eden emvâlin ribhi yevmî on beş akçeye bâliğ olmağın sagīr-i mezbûra nafaka ve kisve-bahâsı için yevmî on beşer akçe takdîr olunmak matlûbumdur dedikde hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi sagīr-i mezbûru emvâlinin ribhi yevmî on beşer akçeye bâliğ olduğu zâhir ve mütehakkik olmağın sagīr-i mezbûrun nafaka ve kisve-bahâsı için târih-i kitâbdan yevmî on beş akçe farz ve takdîr eyleyip meblağ-ı mefrûz-ı mezbûru harc ve sarfa ve lede’l-hâce istidâneye ve vaktü’z-zafer sagīr-i mezbûra rücû‘a izin birle mâ hüve’l-vâki‘ bi’l-ibtigā ketb olundu. Fi’l-yevmi’l-âşir min Cumâdelâhire sene [10]90. Şuhûdü’l-hâl: Mehmed Efendi b. Nasuh, es-Seyyid Ârif Çelebi b. Mustafa, Ahmed Beşe b. Hasan Çukadâr, Hüseyin Çelebi b. Ali ve gayruhüm.