Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 88 Hüküm no: 32 Orijinal metin no: [7a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdi’nin evini Mahmud b. Kasım ve karısına satması Mahmiye-i İstanbul’da İbrahim Çavuş mahallesi sâkinlerinden Mustafa Beşe b. Abdi nâm kimesne meclis-i şer‘-i hatîr-i lâzımü’t-tevkīrde işbu râfi‘ayi’l-kitâb Mahmud b. Kasım ve zevcesi Saime bt. Ahmed mahzarlarında tâyi‘an ikrâr-ı tâm ve takrîr-i kelâm edip akd-i âtî sudûruna değin silk-i mülk ve zabt tasarrufumda olup medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Çavuş Kasım mahallesinde vâki‘ bir tarafdan nalçacı Mustafa oğlu Mehmed mülkü ve bir tarafdan Kalafatçızâde Ahmed Çelebi el-İmâm mülkü ve bir tarafdan tarîk-i hâs ve bir tarafdan tarîk-i âm ile mahdûd üç fevkānî ve iki tahtânî odaları ve bir ahırı ve bi’r-i mâyı ve kenîfi ve bahçeyi müştemil menzilimi cemî‘ tevâbi‘ ve levâhıkı ile mezbûrân Mahmud ve Saime’den ale’l-iştirâki’s-seviy mutasarrıf olmak üzre iki yüz otuz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr iki yüz otuz guruşu mezbûrân Mahmud ve Saime yedlerinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur merkūmân Mahmud ve Saime’nin mülk-i müşterâlarıdır keyfe mâ yeşâ’ân ve yahtârân mutasarrıfân olsunlar dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sânî min şehri Recebi’l-ferd sene [10]90. Şuhûdü’l-hâl: Halil Bey b. Osman, Mehmed b. Mustafa, Ömer b. Hüseyin, Mustafa b. Abdullah, Hüseyin Çelebi b. Mustafa, Mustafa Çelebi b. Mehmed, Hasan b. Abdullah, Ali b. Abdullah, Hasan b. Hüseyin.