Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 88 Hüküm no: 33 Orijinal metin no: [7b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Rizo’nun evini Aleksandra bt. Nikola’ya satması Havâss-ı Aliyye kazâsına tâbi‘ Büyükçekmece nâhiyesine tâbi‘ Menekşe nâm karye ahâlîsinden olup hâlâ mahmiye-i İstanbul’da eski odalar başında sâkin Yani v. Rizo nâm zimmî meclis-i şer‘-i şerîfde işbu râfi‘atü’l-vesîka Aleksandra bt. Nikola nâm nasrâniyye muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup karye-i mezbûrede vâki‘ bir tarafı Şaş v. Manol zimmî mülkü ve bir tarafı değirmenci Nikola v. Minho zimmî mülkü ve iki tarafı tarîk-i âm ile mahdûd bir bâb tahtânî oda ve bir sofa ve zât eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ile mezbûre Aleksandra’ya bin üç yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve kabz ve kabûl eyledikden sonra semeni olan meblağ-ı mezbûr bin üç yüz akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur, mezbûre Aleksandra’nın mülk-i müşterâsıdır keyfe mâ teşâ’ mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min şehri Recebi’l-ferd li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Ali b. Abdullah, Hasan b. Abdullah ve gayruhüm.