Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 89 Hüküm no: 34 Orijinal metin no: [7b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Hasan Ağa’nın evini Hacı Osman Ağa b. Hasan’a satması Sâbıkan dergâh-ı âlî -dâme mahfûfen bi’l-me‘âlî- yeniçerileri ağası olan iftihârü’l-emâcid ve’l-e‘âlî câmi‘ü’l-mehâmid ve’l-me‘âlî zü’l-kadri’r-refî‘ ve’l-câhi’l-menî‘ izzetlü Mustafa Ağa ibnü’l-merhûm Hasan Ağa taraflarından bey‘-i âti’z-zikre ve kabz-ı semen ve kendiye îsâle ve kabz ve îsâl mütevakkıf olduğu umûrun küllîsine vekîl olup hasm-ı câhid mahzarında Mehmed Çelebi b. Receb ve İbrahim Çelebi b. Ahmed nâm kimesneler şehâdetleri ile şer‘an vekâleti sâbite olan Süleyman Ağa b. Bâli nâm kimesne meclis-i şer‘-i şerîf-i lâzımü’t-tevkīrde işbu râfi‘ü’l-kitâb fahrü’l-emâsil ve’l-akrân el-Hâc Osman Ağa b. Hasan tarafından ikrâr-ı âti’l-beyânı tasdîke vekîl olup bimâ hüve tarîkü’s-sübût şer‘an vekâleti sâbite olan el-Hâc Ali b. Bâli mahzarında bi’l-vekâle ikrâr-ı tâm ve takrîr-i kelâm edip müvekkilim mûmâ-ileyh Mustafa Ağa hazretleri akd-i âti’z-zikrin sudûruna değin silk-i mülk ve zabt ve tasarruflarında olup medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de İslâm Bey mahallesinde vâki‘ bir tarafdan Hasan Ağa b. Ali mülkü ve iki tarafdan müvekkil-i müşârün-ileyhin tasarrufunda olan vakf menzil ve bir tarafdan tarîk-i âm ile mahdûd iki tahtânî oda ve bir sofa ve bi’r-i mâyı ve kenîf ve tûlen ve arzen bi hesâb-ı şatrancî iki bin iki yüz otuz iki zirâ‘ arsa-i hâliyeyi müştemil menzil ile yine iki tarafı menzil-i mezkûr ve bir tarafı yine müvekkil-i mûmâ-ileyh tasarrufunda olan vakf menzil ve bir tarafı tarîk-i âm ile mahdûd iki tahtânî odaları ve kenîfi ve tûlen kırk ve arzen on zirâ‘ bi hesâb-ı şatrancî dört yüz zirâ‘ arsa-i hâliyemi müştemil menzili dahi cemî‘ hukūk ve merâfıkı ile müvekkil-i mezbûru el-Hâc Osman Ağa’dan bi safkatin vâhidetin beş yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr beş yüz guruşu müvekkil-i merkūm el-Hâc Osman Ağa yedinde vekâlet-i mahkiyem hasebiyle bi’t-tamâm ve’l-kemâl ahz ve kabz eyledim ba‘de’l-yevm menzileyn-i mahdûdeyn-i mesfûreyn müvekkil-i mûmâ-ileyh el-Hâc Osman Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sânî min şehri Recebi’l-mürecceb li sene tis‘în ve elf. Şuhûdü’l-hâl: Es-Seyyid Abdurrahman Efendi b. es-Seyyid Yakub el-İmâm, Abdülkādir Bey b. el-merhûm Ahmed Paşa, Mehmed Beşe b. Abdullah, Mustafa Çelebi b. Süleyman, Musli Bey b. Receb, Ahmed Beşe b. Hasan, İbrahim b. Abdullah, Mustafa Beşe b. Mehmed, Mehmed b. Eyüb, Ali b. Abdullah ve gayruhüm.