Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 90 Hüküm no: 35 Orijinal metin no: [7b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Efendi b. Süleyman’ın vasiyetini yerine getirmek üzere İbrahim Efendi’nin vasî tayin edilmesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Sofular mahallesi sükkânından Şaban Efendi b. Süleyman tarafından husûs-ı âti’l-beyânı ikrâra vekîl olup hasm-ı câhid mahzarında el-Hâc Mustafa b. Ramazan ve Ahmed Efendi b. Mehmed nâm kimesneler şehâdetleri ile şer‘an vekâleti sâbite olan İbrahim Çelebi b. Abdülbâkī nâm kimesne meclis-i şer‘-i şerîfde işbu râfi‘ü’l-kitâb İbrahim Efendi b. Resul mahzarında bi’l-vekâle ikrâr-ı tâm ve takrîr-i kelâm edip müvekkilim mezbûr Şaban Efendi bi emrillâhi te‘âlâ dâr-ı fenâdan sarây-ı bekāya intikāl ve irtihâl eylediğimde mecmû‘ malımdan beş bin akçe ihrâc ve ifrâz olunup techîz ve tekfîne ve eyyâm-ı mu‘tâdede fukarâ-yı müslimîne tabh-ı ta‘âm oluna ve sâir emvâlimden dahi kendim tahrîr ettiğim defter nâtık olduğu üzre, düyûn-ı müteferrikam dahi edâ oluna deyû vasiyyet edip vesâyâ-yı mezbûrenin tenfîzine mûmâ-ileyh İbrahim Efendi’yi vasiyy-i muhtârı nasb ve ihtiyâr eyledi dedikde mezbûr İbrahim Efendi dahi vesâyet-i merkūmeyi kabûl ve hıdemât-ı lâzımesini edâya ta‘ahhüd ve iltizâm etmeğin mâ cerâ gıbbe’l-ibtigā ketb olundu. Fi’l-yevmi’l-âşir min Cumâdelâhire li sene tis‘în ve elf. Şuhûdü’l-hâl: Abdüsselâm Efendi b. Nasuh, es-Seyyid Ahmed Çelebi b. Nuh, el-Hâc Âşir b. ( ) el-Bevvâbü’s-sultânî, İvaz Bey b. Mehmed, Hasan b. Abdullah, Mehmed b. Eyüb.