Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 90 Hüküm no: 36 Orijinal metin no: [7b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiryazi v. Yorgi’nin evini müştemilatıyla Yorgaki v. Dimitri’ye satması Mine’l-asl vilâyet-i Rumeli’nde kasaba-i Göllükesri mahallâtından Varlağam mahallesi ahâlîsinden olup hâlâ mahmiye-i İstanbul’da Mahmud Paşa hanında müsâfiren sâkin olan Kiryazi v. Yorgi nâm zimmî meclis-i şer‘-i şerîfde işbu râfi‘ü’l-kitâbi’r-rakīm Yorgaki v. Dimitri nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Tolko v. Sarko nâm zimmî mülkü ve bir tarafdan Pîrî Lefteri v. Kavali nâm zimmî mülkü ve bir tarafdan ba‘zan Rali v. Yorgi nâm zimmî mülkü ve ba‘zan göl ve bir tarafdan tarîk-i âm ile mahdûd iki bâb fevkānî oda ve altında mahzeni ve avluyu ve zât eşcâr-ı müsmire ve gayr-ı müsmire bahçeyi müştemil menzilimi cemî‘ tevâbi‘ ve levâhıkı ve âmme-i hukūk ve merâfıkı ile merkūm Yorgaki’ye beş yüz kıt‘a esedî guruşa tarafeynden [8a] îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer iştirâ ve kabûl eyledikden sonra semeni olan meblağ-ı mezkûr beş yüz esedî guruşun dört yüz kırk üç guruşunu mersûm-ı mezbûr Yorgaki’ye zimmetinde lâzımü’l-kazâ deynim olan dört yüz kırk üç esedî guruşa takās edip ol dahi mukāssa ve kabûl eyleyip meblağ-ı bâkī elli yedi esedî guruşu dahi nakd-i merkūmu Yorgaki yedinden tamâmen ahz ve kabz eylediğimden sonra zikr olunan menzili mahallinde zabt ve tasarrufa mesfûr Yorgaki’yi taslît eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min şehri Recebi’l-ferd li sene tis‘în ve elf. Şuhûdü’l-hâl: Mustafa Çavuş b. Abdullah, Muharrem Çavuş b. Abdullah, Ali b. Abdullah, Mehmed b. Eyüb ve gayruhüm mine’l-huzzâr.