Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 91 Hüküm no: 38 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evlice Baba Vakfı mütevelliliğine Mustafa Çelebi b. Mehmed’in tayini Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de vâki‘ merhûm Evlice Baba vakfı olan nukūd-ı mevkūfe-i müteferrikanın mütevellîsi olan Osman Çelebi b. Mehmed Usta nâm kimesne meclis-i şer‘-i şerîf-i envere gelip hıdemât-ı lâzıme-i mühimmem kesîre olmağla tevliyyet-i merkūme uhdesinden gelmeğe iktidârım yokdur deyû kendi rızâ ve hüsn ihtiyârım ile tevliyyet-i mezkûreden kasr-ı yed eyledim dedikde mahalle-i mezbûre sükkânından işbu hâmilü’l-vesîka Mustafa Çelebi b. Mehmed nâm kimesne için zeyl-i kitâbda isimleri muharrer olan ahâlî-i mahalle-i mezbûrenin her biri tevliyyet-i mezkûre uhdesinden gelmeğe her vechile kādir ve mahall ve müstahıkdır deyû ihbâr etmeleriyle hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi tevliyyet-i mezkûreyi yevmî dört akçe vazîfe-i mersûmesiyle mezbûr Mustafa Çelebi’ye tevcîh edip tasarrufu için işbu vesîka alâ mâ hüve’l-hakīka gıbbe’l-ibtigā ketb olunup yed-i tâlibine def‘ olundu. Fi’l-yevmi’r-râbi‘ min şehri Recebi’l-mürecceb li sene tis‘în ve elf. Şuhûdü’l-hâl: Es-Sâbikūn.