Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 93 Hüküm no: 40 Orijinal metin no: [8a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Ağa b. Ramazan’ın yoğurthanesini Mustafa Ağa b. Hasan’a satması Umdetü’l-muhadderât zübdetü’l-muvakkarât aliyyetü’z-zât Hatice Sultan -dâmet ismetühâ- hazretlerinin mahmiye-i İstanbul’da hısnı ebvâbından Hazret-i Ebâ Eyyûb-i Ensârî kapısı hâricinde Şişeci Mehmed Çelebi mahallesinde vâki‘ hadîkalarının ustası olan Hüseyin Ağa b. Ramazan tarafından husûs-ı âti’l-beyânı ikrâra vekîl olup hasm-ı câhid mahzarında Mehmed Ağa b. Hasan ve Ahmed b. Ali şehâdetleriyle şer‘an vekâleti sâbite olan Ali Efendi b. Mehmed meclis-i şer‘-i şerîf-i enverde müşârün-ileyhimâ sultân hazretlerinin kethüdâları olup işbu kitâb-ı sıhhat-nisâbın sâhibi olan iftihârü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’r-refî‘ ve’l-izzi’l-menî‘ Mustafa Ağa b. Hasan tarafından ikrâr-ı âti’z-zikri tasdîke vekîl olup bimâ hüve tarîkü’s-sübût şer‘an vekâleti sâbite olan Süleyman Efendi b. er-Râcil mahzarında bi’l-vekâle ikrâr-ı tâm ve takrîr-i kelâm edip müvekkilim mezbûr Hüseyin Ağa akd-i câ’i’z-zikrin sudûruna değin silk-i mülk-i sahîhinde münselik olup mahalle-i mezbûrede vâki‘ bir tarafı İbrahim Çavuş mülkü [ve bir tarafı] sâhil-i bahr ve iki tarafı tarîk-i âm ile mahdûd senede Ayasofya-i kebîr vakfı’na altmış akçe mukāta‘ası olan mülk yoğurthâneyi müvekkil-i mûmâ-ileyh Mustafa Ağa’ya üç yüz kıt‘a esedî guruşa tarafeynden îcâb ve kabûlü [hâvî] bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezkûr üç yüz guruşu müvekkil-i mûmâ-ileyh Mustafa Ağa yedinden tamâmen ahz ve kabz eyledim min ba‘d sâlifü’z-zikr yoğurthâne müvekkil-i müşârün-ileyh Mustafa Ağa’nın mülk-i müşterâsı olmuşdur keyfe mâ yeşâ’ [8b] ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’l-hâdî aşer min şehri Recebi’l-ferd li sene tis‘în ve elf. Şuhûdü’l-hâl: Mehmed Ağa b. Ömer, Hüseyin Çelebi b. Yazıcı, Mahmud Ağa, Ali Usta b. ( ), Yusuf Usta b. ( ), Nasuh Hoca, Hüseyin Çelebi b. Ali.