Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 94 Hüküm no: 41 Orijinal metin no: [8b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasımpaşa Câmii müezzini Abdullah Halife’nin hacca gitme niyeti sebebiyle işleri için yerine vekil tayini Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de vâki‘ merhûm Kasım Paşa câmi‘-i şerîfinde müezzin ve Selâmi Mehmed Bey ve Âsım Ahmed vakıflarına câbî olan Abdullah Halîfe b. Mustafa nâm kimesne meclis-i şer‘-i şerîf-i enverde işbu hâmilü’l-vesîka Mehmed Halîfe b. Abdünnebi nâm kimesne mahzarında takrîr-i kelâm edip ben işbu sene-i mübârekede hacc-ı şerîfe kasd ve azîmetim mukarrer olmağın üzerime edâsı lâzım gelen hıdemât ve cihâtın edâsına vazîfelerini mütevellîlerinden ahz ve kabza ve menzilimde sâkinetân olup üzerime nafaka ve kisveleri lâzım gelen vâlidem ile zevceme îsâl ve teslîme ve kabz ve îsâle mütevakkıf olduğu umûrun cümlesine mezbûr Mehmed Halîfe’yi tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i merkūmeyi kabûl ve hıdemât-ı lâzıme-i mezkûrenin edâsına ta‘ahhüd ve iltizâm eylediğinden sonra işbu hâzır bi’l-meclis İbrahim Efendi b. Hasan nâm kimesneyi dahi mezbûr Mehmed Halîfe üzerine hasbî nâzır nasb eyledim dedikde ol dahi nezâret-i merkūmeyi kabûl ve merâsimini edâya müte‘ahhid olmağın mâ cerâ alâ hâze’l-minvâl bi’l-ibtigā ketb olundu. Fi’l-yevmi’l-hâdî aşer min şehri Recebi’l-mürecceb li sene tis‘în ve elf. Şuhûdü’l-hâl: Mehmed Efendi b. Nasuh, es-Seyyid Ârif Çelebi b. Mustafa, Ahmed Bey b. Abdullah Berber, Mehmed Çelebi b. ( ) ve gayruhüm.